O Consello da Xunta
acordou onte a aprobación provisional, para a súa próxima información pública,
do proxecto de trazado para o acondicionamento da estrada OU-533 entre A Gudiña
e Viana do Bolo, que suporá un investimento de case 15,6 M€.
Antecedentes
A estrada OU-533
ten unha lonxitude total de algo máis de 50 quilómetros e unha orientación sur
- norte, unindo a autovía A-52 e a estrada N-525 ao sur (A Gudiña) coas
estradas N-120 e OU-536 ao norte (A Rúa), estando situada, ao comezo da OU-533,
a nova estación do AVE na Gudiña (Estación “Porta de Galicia”).
A Consellería de
Vivenda e Planificación de Infraestruturas, a través da Axencia galega de
infraestruturas, elaborou un estudo previo realizado nesta estrada, en que se
propoñía o acondicionamento da OU-533 ata conseguir uns parámetros de trazado
homoxéneos, mellorando os actuais e permitindo unha condución cómoda e segura.
A actuación
Deste xeito, o
treito obxecto do proxecto de acondicionamento desta vía autonómica, segundo o
acordado polo Goberno galego, correspóndese co treito prioritario determinado
no estudo previo, e que se corresponde co tramo da OU-533 entre A Gudiña e
Viana do Bolo. O obxectivo é actuar nesta zona, algo mais de 15 quilómetros de
lonxitude, entres os puntos quilométricos 1+000 e 16+700, en que practicamente
non se poden realizar adiantamentos.
Para acadar este obxectivo no proxecto provisional
aprobado, o departamento de Infraestruturas da Xunta proponse executar unha
actuación integral de acondicionamento na OU-533, neste treito comprendido
entre A Gudiña e Viana do Bolo, co obxectivo de mellorar a seguridade viaria,
incrementar a capacidade e facilitar os adiantamentos nesta vía e de
importancia estratéxica para o sur da provincia de Ourense. Así, deséñase un
novo trazado sobre a base da estrada actual, realizando a mellora de
interseccións, e habilitando carrís adicionais de adiantamento.
Coas actuacións
propostas auméntanse os tramos con terceiros carrís de adiantamento, pasando
dunha lonxitude actual total de 760 metros en sentido crecente (sentido A Rúa)
e 600 metros en sentido decrecente (sentido A Gudiña), a unha lonxitude futura
de 2.600 metros en sentido crecente e 4.460 metros en sentido decrecente.
O proxecto tamén
prevé melloras de trazado, buscando o incremento das visibilidades existentes
para reforzar a seguridade viaria, destacando a variante de trazado entre os
puntos quilométricos 5+000 e 7+100, que permite a eliminación de varias curvas
de raios reducidos, o que tamén
permitirá reducir a distancia de percorrido en algo máis de 700 metros deste
treito de estrada.
En canto á
seguridade viaria, mellórase a seguridade de 8 interseccións en que se proxecta
a disposición de novos carrís centrais de espera. Ademais, configúrase en 7 dos
casos a intersección para que se poida realizar un cambio de sentido con
seguridade. Tamén se acondicionarán outras 17 interseccións de camiños
secundarios mediante o ensanchamento dos seus accesos.
Ademais, prevese a
extensión dunha nova capa de rodaxe en toda a plataforma da estrada (calzada +
beiravías), renovando por completo o pavimento do tramo de proxecto.
Finalmente, reporase a sinalización, o balizamento e as defensas, adecuándoas
ás novas solucións expostas.
Pasos seguintes
O proxecto
someterase a información pública nos vindeiros días, para os efectos da Lei
8/2013, de estradas de Galicia, e para efectos expropiatorios, por un prazo de
1 mes. Nesta intervención é necesario a expropiación de 189 predios, das cales 12 pertencen ao concello
da Gudiña e 177 a Viana do Bolo.
O obxectivo da
Xunta é poder aprobar de xeito definitivo o proxecto de trazado no último
trimestre deste ano para, posteriormente, licitar a redacción do proxecto
construtivo.
