O presidente da Xunta,
Alfonso Rueda, informou de que o Consello aprobou hoxe o proxecto da que será a
primeira Lei do clima de Galicia, unha norma que se marca como reto principal
dotar a comunidade das ferramentas, órganos e instrumentos necesarios para
garantir a consecución “da neutralidade climática —o equilibrio entre as
emisións de gases de efecto invernadoiro (GEI) e as absorcións— no horizonte do
ano 2040”, é dicir, unha década antes do prazo fixado pola UE.
A lei introduce o clima
como eixo transversal das políticas públicas galegas e fíxase o obxectivo de
reducir nun 75 % as emisións contaminantes en 2030
― Galicia será a primeira
comunidade en fixar por lei o reto da neutralidade climática
― A conselleira de Medio Ambiente e Cambio
Climático asegura que esta norma permitirá "unha transición ecolóxica
xusta, sostible e xeradora de emprego verde”
― Os plans e programas
sectoriais autonómicos sometidos a avaliación ambiental estratéxica deberán
avaliar o impacto no clima e incluír medidas de compensación
― Promoveranse as accións
para preparar o territorio e protexer a cidadanía dos riscos ligados ao
quecemento global como, por exemplo, a creación de refuxios climáticos
― Por primeira vez
regularase en Galicia a contratación pública verde, que integrará de forma
progresiva criterios climáticos nos contratos do sector público autonómico
― Tamén se promoverán
medidas fiscais que incentiven o sector privado a contribuír a conseguir os
obxectivos de mitigación e adaptación da comunidade
― Reforzaranse as redes
autonómicas de meteoroloxía e de calidade do aire para poder dispoñer de máis
datos e mellorar a capacidade de previsión
