O Goberno galego tamén autorizou o expediente correspondente aos
trámites de información pública e o informe das administracións afectadas pola
execución desta intervención.
O obxectivo desta actuación é incrementar a capacidade de case 43 quilómetros desta vía autonómica, reforzar a seguridade viaria e aumentar a competitividade neste exixe de comunicación do interior do sur da provincia de Ourense e co país veciño, en beneficio dos concellos de Celanova, Verea, Bande, Lobeira, Muíños, Entrimo e Lobios e do parque natural da Serra do Xurés.
A OU-540 rexistra unha intensidade de tráfico que vai desde os 2.594 vehículos ao día entre Celanova e Bande, aos 922 no treito máis próximos á fronteira con Portugal. Con esta actuación os 13.000 habitantes dos concellos situados na traza da vía autonómica mellorarán a súa accesibilidade, ao vertebrar a OU-540 o interior da comarca da Baixa Limia e conectala con Celanova e a cidade de Ourense, ademais de con Portugal a través da Madalena.
O proxecto aprobado hoxe polo Goberno galego prevé ampliar a capacidade e funcionalidade da estrada OU-540, con case 7 novos quilómetros de terceiro carril de adiantamento, favorecendo de xeito considerable a circulación.
Ademais construiranse dúas glorietas no concello de Bande, melloraranse e redeseñaranse 11 interseccións e reordenaranse xiros á esquerda, para favorecer o cruce da estrada e os distintos movementos en condicións de maior seguridade.
Tras a análise das achegas recibidas, ampliarase a plataforma da estrada entre os puntos quilométricos 36+430 e 36+860 cara á marxe dereita, en lugar de cara á esquerda, co fin de protexer o xacemento do Vieiro. A maiores, incorporarase un carril central de espera na intersección do quilómetro 24+470 coa OU-531; no cruce do quilómetro 45+770, de acceso ás Maus; e na intersección do quilómetro 56+650, de acceso ao punto limpo de Lobios.
Estas actuacións completaranse coa mellora do firme alí onde sexa necesario e coa limpeza e despexe das marxes para favorecer a visibilidade.
O proxecto aprobado hoxe polo Goberno galego desenvolverase en dúas fases, prevéndose licitar nas vindeiras semanas a execución das obras da primeira delas, e poder tramitar en paralelo o procedemento expropiatorio ao procedemento de adxudicación.
Xunto con isto, o proxecto recolle a mellora de interseccións, como é o caso dunha prevista en Bande norte, así como a execución de sendas peonís para favorecer os desprazamentos a pé dos veciños nos núcleos de Carballo e de Agrelo, en Verea.
O segundo treito discorre entre o concello de Bande e a fronteira Portuguesa e o orzamento superará os 7,2 M€.
