En Quintela, vendo as incipientes obras do tramo Eirasvedras-Quintela, o primeiro da Variante Norte de Ourense

 

Como teño relatado nunha entrada deste Blog, o pasado 16 de setembro tivo lugar o acto institucional de comezo das obras do tramo Eirasvedras-Quintela, o primeiro da Variante Norte de Ourense, que se integrará na futura autovía A-56 Ourense-Lugo

Un acto ao que lamentablemente non puiden asistir, como consecuencia do comportamento sectario da  Secretaria de Estado,  Isabel Pardo de Vera, e do delegado do Goberno en Galicia, José Manuel Miñones, que só invitaron a altos cargos socialistas excluíndo aos do Partido Popular e das demais forzas políticas. Un feito lamentable.

Hoxe domingo, fun correndo ata o lugar onde se celebrou aquel acto e puiden ver como se apreciaban uns estaquillados, algunhas rozas e pouco máis. Non vi maquinaria algunha estacionada, nin caseta de obra, tan só os carteis anunciadores como prescribe o contrato. Estas fotos que fixen, acredítano.

Espero que as obras avancen de forma efectiva, pois é moito o interese que teño en que esta obra sexa pronto unha realidade, como veño acreditando polas decenas de iniciativas que na miña vida parlamentaria fixen para impulsalas. 

E que me propoño seguir formulando mentres sexa parlamentario, para controlar esta obra e interesarme polo tramo seguinte entre Quintela e A Casilla, que xa tiña que estar licitado.

Como é coñecido, este primeiro tramo da variante entre Eirasvedras e Quintela, está enmarcado nunha contorna periurbana, e prevese que captará o tráfico de longo e medio percorrido, acurtando os tempos de tránsito respecto á travesía.

Para os veciños desta zona supoñerá un incremento da seguridade viaria e unha mellora ambiental, ao diminuír o ruído e a polución. Ademais, permitirá ceder ao concello de Ourense un tramo da actual N-120 paralelo ao río Miño que fará posible desenvolver o bulevar termal de Ourense.

O trazado ten a súa orixe na ligazón de Eirasvedras da Autovía das Rías Baixas (A-52), coa N-120 na súa p.k. 573,800, ao oeste da localidade, onde existen actualmente dúas calzadas separadas, baixo o paso superior do ramal da estrada N-120 que dá acceso a Ourense a través da calzada unidireccional da N-120. 

As dúas novas calzadas do variante Norte de Ourense, conectan coas existentes da citada ligazón de maneira que se dá continuidade á N-120 cara á N-525 e viceversa. Tras un percorrido de 1,733 km, o tramo finaliza na ligazón de Quintela onde conecta coa N-120 á altura do núcleo de Tarascón (p.k. 572,000).

Ao longo do trazado deséñanse 2 ligazóns (a ligazón de Eirasvedras e a ligazón de Quintela), un viaduto sobre a N-120 e a liña ferroviaria Monforte de Lemos – Vigo (Viaduto de Quintela), unha ponte sobre o Río do Porto e dous pasos inferiores, un baixo o tronco e outro baixo un dos ramais da ligazón de Quintela, que permitirá o cruzamento deste ramal sobre o ferrocarril Monforte de Lemos– Vigo.