viernes, 7 de enero de 2022

O compromiso da Xunta coa Atención Primaria tamén se reflicte nos orzamentos para 2022, representando un terzo do total do gasto sanitario

 

Esta mañá estiven nun Centro de Saúde de Ourense, o de A Ponte, onde os profesionais de medicina, enfermería, auxiliares, administrativos e de servizos traballaban con eficacia atendendo aos usuarios que acudían. 

Fun recoller na area de atención ao público unha folla de dosificación de anticoagulante para o meu pai de 93 anos. Previamente unha enfermeira dese Centro despzrazouse ata o domicilio a tomar a mostra de sangue do sintrom. O mercores pasado outra enfermeira dese Centro de Saúde estivo tamén no domicilio dos meus  país facendo unha cura dunha ferida a miña nai, que está impedida e non pode sair de casa.

Conto esta satisfactoria vivencia persoal, para reflexionar sobre o inxente e eficaz traballo que prestan os sanitarios de atención primaria do SERGAS, máxime nesta época na que o coronavirus golpea con forza. Hoxe mesmo na área de  Ourense hai 7.454 casos activos e no conxunto de Galicia un total de 61.635.

Escoito hoxe varias emisoras de radio e vexo a televisión de Galicia e comprobo como o  PsdeG e o BNG, están en plena campaña de ataque á Xunta de Galicia pola  medida de suxerir a restrición da actividade en 14 centros de Atención Primaria na área de Vigo, a máis castigada polo coronaviis, hoxe ten 13.559 casos activos.

Os nacionalistas falan de "ataque contra a sanidade pública, universal e gratuíta, ao obstaculizar a asistencia en casos de enfermidades comúns e non urxentes". Pola súa banda os socialistas denuncian que a Xunta non contratou a profesionais a pesar de recibir diñeiro para iso por parte do Goberno de España. "Xogan coa saúde", din.

É lexítimo facer oposición, ben plantexada estimula e resulta necesaria, pero non pode facerse de calquera xeito e sobre todo esaxerando e faltando á verdade.

O certo é que a atención primaria preocupa moito ao executivo de Alberto Núñez Feijóo e tamén os que formamos parte do Partido Popular.

Lembro que o pasado 22 de decembro o conselleiro de Sanidade, Julio García Comesaña, sinalou no Parlamento de Galicia, en resposta a preguntas dun dos grupos da Cámara referida á atención sanitaria na comarca do Baixo Miño e no concello de Moaña, que a carencia de profesionais especialistas en medicina familiar e comunitaria está dificultando a cobertura estable de prazas como as dos centros destas localidades, nas que quedan vacantes nos concursos de traslados ou é inviable atopar persoal substituto cando se dan casos de incapacidades laborais de moi longa duración, tal e como ten ocorrido nestes casos.

O conselleiro salientou que non se trata dun problema económico, como queda evidenciado polo feito de que os Orzamentos da Xunta para 2022 aprobados recenetemente incorporan 541 millóns de euros para persoal de atención primaria, o que supón 99,7 millóns máis que no ano 2009; senón dunha carestía de persoal especialista dispoñible para as prazas de medicina familiar e comunitaria.

Esta dificultade para encontrar persoal substituto é común en toda España, por iso destacou o traballo que realiza a área sanitaria de Vigo para cubrir todas as vacantes e ausencias, optando polas medidas ás que están recorrendo todos os sistemas sanitarios de España, e que foron pactadas na mesa sectorial coas organizacións sindicais, como son a prolongación de xornada e a intersubstitución.

Así, o titular da carteira sanitaria agradeceu a todos os profesionais que asumen cupos dos compañeiros ou que afrontan os días con prolongacións de xornada, o seu traballo e a súa dedicación que posibilita seguir prestando atención aos pacientes.

Porén, lembrou que a chave para resolver este tipo de situacións é a incorporación dun maior número de especialistas en medicina familiar e comunitaria, para o que a Xunta de Galicia ten demandado xa varias medidas ao Goberno de España: en primeiro lugar a acreditación de 64 novas prazas de docencia MIR en atención primaria en Galicia, en segundo lugar a convocatoria extraordinaria de máis prazas MIR de medicina familiar e comunitaria en toda España, en terceiro lugar a creación da especialidade de urxencias para eliminar o trasvase de persoal formado na especialidade de medicina familiar aos servizos de urxencias e finalmente un conxunto de 20 medidas a medio prazo para reformar tanto o sistema de acreditación de prazas docentes como o programa formativo da especialidade de medicina familiar e comunitaria.

Reorganización da atención primaria


García Comesaña lembrou que, no eido das súas competencias, a Xunta de Galicia está a tomar medidas que permitan desconxestionar as axendas dos profesionais de medicina de atención primaria a través de medidas como a implantación das axendas de calidade, cunha distribución máis racional dos tempos, a potenciación das capacidades doutras categorías existentes na atención primaria, como queda patente coa creación nos Orzamentos para 2022 de 81 novas prazas de enfermaría e 28 de farmacia de atención primaria ou a implantación dun sistema de xestión de demanda denominado XIDE, que está a ser pilotado en varios centros de saúde galegos, e que permitirá a derivación do paciente cara ao profesional máis axeitado para resolver a súa necesidade, evitando que todas teñan que pasar pola consulta do médico.

En relación coas condicións laborais, o conselleiro reiterou a aposta da Xunta de Galicia pola creación do contrato de continuidade, unha oferta de contratación estable de ata tres anos e con compromiso de creación posterior dunha praza fixa.

Este contrato comezou a implantarse en 2019 e os Orzamentos de 2022 xa crean 82 prazas fixas derivadas dos primeiros que foron asinados, cumprindo co compromiso realizado. Lembrou tamén que a lei de medidas fiscais e administrativas aprobada polo Parlamento de Galicia crea unha nova categoría, a de facultativo especialista en atención primaria, coa intención de poder ofertar prazas máis atractivas.