Unha
proposta que respectando o actual inmoble, construído a finais do século XIX e
declarado Ben de Interese Cultural en 1975, transformará o uso administrativo
do actual edificio nun establecemento hoteleiro de 5 estrelas cunha ampla
oferta termal, a escasa distancia dun dos emblemas da cidade como As Burgas e
na contorna da área comercial e o casco vello da cidade.
Informa a Deputación na web que “no patio do Pazo
Provincial onde o anteproxecto sitúa unha piscina termal de inspiración romana,
representantes dos ámbitos institucionais, económicos, sociais e termais da
provincia coñeceron os detalles dunha iniciativa "que é o resultado da
captación termal protexida que realizamos neste lugar e que nos permitiu atopar
un acuífero termal máis que suficiente -3 litros por segundo, a unha
temperatura de 41,6 graos a 172 metros de profundidade e cun contido en sales
minerais propio das augas termais de Ourense- para construír o que sen dúbida
será un dos balnearios referentes de toda Europa", destacou o presidente
provincial.
"Non hai en España nin Europa un
territorio coa riqueza que posúe a provincia, con 15 concellos termais
implicados nun plan de aproveitamento deste recurso que puxemos en marcha en
2014", sinalou Manuel Baltar, "pero botábamos en falta un balneario
que estivera á altura dos 51 sitios de 18 nacións europeas con maior relevancia
termal que forman parte da Asociación de Cidades Históricas Termais de Europa
que presido".
Agora, engadiu, a Deputación "pon
a disposición do desenvolvemento termal de Ourense nin máis nin menos que a súa
sede, un legado que vai supoñer un elemento transformador da cidade e a
provincia e unha iniciativa na que desde o minuto uno estiveron interesados
inversores, cadeas internacionais e xestores de balnearios, xusto nun momento
histórico coa sacudida competitiva que suporá a chegada da alta velocidade en
decembro".
Un gran hotel, subliñou Manuel Baltar,
que tamén renderá homenaxe "a un dos xigantes das nosas letras e emblema
da cultura, Eduardo Blanco Amor, e a esa cidade ideal -Auria- na que o escritor
ambientaba as súas obras e na que se pode recoñecer a Ourense". Un dos
membros da xeración Nós, que no 2020 celebrou ou seu centenario e que foi
precisamente a primeira en promover a construción dun gran hotel balneario na
cidade das Burgas.
Un inmoble único no centro de Ourense
O redactor do anteproxecto e presidente
do comité científico da asociación de cidades termais, Mario Crecente, foi o
encargado de dar a coñecer os principais aspectos das futuras instalacións,
facendo en primeiro lugar un percorrido pola historia do Pazo Provincial,
concibido inicialmente como fábrica de fiaduras e que mudou ao longo do tempo
os seus usos. No centro de Ourense, sinalou, "non existen case inmobles
coa superficie, valor patrimonial e posibilidade de adaptación a un uso
hoteleiro como o Pazo Provincial, converténdose nunha gran oportunidade para
crear un referente hoteleiro e termal".
O propósito é construír un
establecemento hoteleiro de 5 estrelas que complete a súa oferta cun uso
termal, tanto para o público xeral como para os hóspedes, cubrindo os patios
interiores con solucións tecnolóxicas e reversibles para protexer do sol o
interior e captar enerxía. No patio norte situarase unha gran piscina cadrada,
de inspiración romana rodeada por un circuíto balneario con bañeiras, saunas,
cabinas de chorros e zonas para inhalación e descanso. O patio situado ao sur
empregarase como espazo polivalente para acoller unha ampla variedade de
eventos como presentacións, conferencias, concertos ou ser empregado a modo de
terraza cuberta do restaurante e do hotel. A intervención busca tamén mellorar
a eficiencia enerxética, aproveitando por exemplo a calor da captación termal,
actuacións encamiñadas a acadar unha certificación de sustentabilidade.
Entre 52 e 71 habitacións
As habitacións disporanse nas plantas
primeira e segunda, con seis tipos de aloxamentos (individual, dobre, dobre
premium, suite, suite con spa, suite con dúas habitacións e spa), que superan
os estándares da normativa autonómica. Valoráronse tres distintas opcións de
distribución de 52 a 71 habitacións. As suites con spa complementan as súas
prestacións coa posibilidade de realizar tratamentos con auga termal no propio
cuarto, grazas á presenza dunha bañeira.
A planta baixa do hotel, na que se atopan os accesos e a recepción, conservará a disposición actual da biblioteca, mentres que na esquina situada ao carón do Centro Cultural Marcos Valcárcel situarase o bar, cunha temática pensada para a degustación e promoción dos viños das catro Denominacións de Orixe que ten a provincia. Con entrada independente, distinguiranse dous comedores, con capacidade para 70 persoas. Adicionalmente, poderíase dispoñer do patio sur, incrementando a capacidade total para eventos a máis de 170 persoas."
DIRECTO | Presentación del anteproyecto del Gran Hotel Balneario de Ourense - YouTube
