Baltar: “Indigna ver como o PSOE de Ourense aplaude a marxinación orzamentaria máis grande na historia da provincia”

 

O presidente provincial do PP, Manuel Baltar, afirmou hoxe que “indigna ver como o PSOE de Ourense aplaude a marxinación máis grande na historia da provincia, cuns orzamentos estatais para 2021 que reducen nun 70 % os investimentos destinados ao noso territorio con respecto ás últimas contas vixentes, aprobadas no 2018 polo goberno de Mariano Rajoy”.

 Manuel Baltar valorou así o proxecto de Orzamentos Xerais do Estado no transcurso da reunión que hoxe mantuvo, por videoconferencia, cos representantes ourensáns no Congreso, Ana Vázquez e Celso Delgado, e no Senado, Miguel Ángel Viso, Carmen Leyte, Francisco José Fernández e Jesús Vázquez.

A cita tivo lugar horas antes de que remate o prazo para a presentación de emendas -mañá martes-, “que sabemos serán rexeitadas, pero nas que insisteremos na tramitación das contas no Senado, porque estamos diante dun deliberado maltrato con Ourense”, sinalou o presidente dos populares ourensáns.

 Desde a perspectiva das administracións locais, Baltar criticou que non se tivera en conta ningunha das reivindicacións formuladas por concellos e deputacións, “que van quedar sen os prometidos fondos COVID-19, nunha clara manobra de vinganza e desprezo por botar abaixo o intento de apropiación dos aforros de municipios e provincias”.

Pola súa banda, os representantes ourensáns no Congreso e no Senado cualificaron o proxecto de orzamentos xerais como “un escándalo e un ataque intencionado a Ourense, cun PSOE que nunca defendeu á nosa provincia e que tenta atacar ao PP con estas contas, cando realmente as consecuencias deste uso partidista do Estado e as súas institucións só serán para a provincia e os ourensáns”.

Ademais de analizar no seu conxunto as emendas presentadas aos orzamentos –“cun desastre absoluto en materia de estradas-, os membros de ambas as dúas cámaras lexislativas insistiron na marxinación que sofre Ourense, “que só recibirá 3 de cada 10 euros contemplados nos orzamentos de 2018, aínda hoxe vixentes”. En total, 123,8 millóns de euros fronte aos 414 millóns de hai dous anos, é dicir, un 70 % menos.

“Os socialistas de Ourense non miran pola súa provincia -engadiron- e por riba aínda se gaban dunhas contas que non responden a ningún criterio obxectivo, nin tan siquera á loita contra a pandemia, senón a un reparto indecente do diñeiro para conseguir o apoio daqueles que queren rachar coa unidade de España e, aínda peor, traspasando todas as liñas imaxinables ao pactar con Bildu”.