No faladoiro de "Voces de Galicia" en Radio Voz


Participo esta mañá na  tertulita do programa Voces de Galicia de Radio Voz, que moderou Eva Millán e na que interveu tamén Ricardo García Mira.

Falamos en primeiro lugar das dificultades de Pedro Sánchez para concitar apoios para a súa investidura e o consecuente risco de repetición das eleccións. Dixen que os 42 escanos de Unidas-Podemos  son imprescindibles para sumarse cos 123 do PSOE e chegar a 165 apoios no Congreso.  Conseguir os que faltan ata 176 pode resultar moito máis fácil.

Afirmei que Sánchez  está a comportarse durante estes meses coma se tivese maioría absoluta, dun modo arrogante, pretendendo unha investidura á carta para contar cun goberno en solitario, e con apoios por activa ou pasiva do resto de grupos.

Engadín que é sumamente chocante que Pedro Sánchez reclame a abstención dos demais, cando no seu propio libro “Manual de resistencia”, manifesta que a abstención do PSOE na investidura de Rajoy “foi unha idea pésima e unha equivocación de magnitude histórica”. Debería lembrar isto cando pide ao PP e a outras formacións políticas que se absteñan.

Sobre a consulta convocada por Podemos dixen que como sucede sempre, os moi poucos inscritos que participarán probablemente  secundarán a posición de Pablo Iglesias  de que para investir presidente a Sánchez é necesario chegar a un acordo integral de Goberno de coalición onde as forzas da coalición teñan unha representación razoablemente proporcional aos seus votos.

Falamos tamén dunha das conclusións ás que chegan os servizos xurídicos do Estado na demanda presentada este mércores no Xulgado de Primeira Instancia e Instrución número 1 da Coruña contra os herdeiros de Franco por entender que a compra do pazo de Meirás foi simulada e fraudulenta e falseouse o título co que se rexistrou.
Dixen que alégranos que o Goberno de España coincida cos criterios que manifestou a Xunta de Galicia, que considera que hai razóns para reclamar a propiedade para o dominio público do Pazo de Meirás, por razóns legais, non políticas, por entender que debe ser patrimonio público e non patrimonio privado. Agardemos que a Xustixa estime esas peticións.
A moderadora propúxonos comentar a noticia de que o ano pasado morreron en Galicia 144 persoas en accidentes de tráfico. E que eses datos inclúense as vítimas mortais rexistradas nas travesías e dentro das poboacións.
E que a DXT destaca que as distraccións son, desde o 2016, a primeira causa dos accidentes mortais, co 32 %, seguida da velocidade (22 %) e do binomio alcol/drogas, o factor decisivo no 21 % dos accidentes mortais. Dixen que nos ámbitos urbanos constátase que tanto peóns como condutores non prestan a debida atención. Non hai máis que ver o mal uso que se está facendo do teléfono móbil que sen dúbida está a incidir na  causación de moitos accidentes. Tamén a falta de respecto aos límites de velocidade nos ámbitos urbanos é un feito evidente que debe corrixirse.

Finamente Eva, quixo que  habásemos da problemática dos pisos turísticos que como no caso de Santiago de Compostela está a xerar problemas e queixas dos hostaleiros.

Dixen, que esta oferta turística ten todo o dereito de existir pero debe sempre cumprir o que as leis establecen. Lembrei que en Galicia dispoñemos dun Decreto, o 12/2007 polo que se establece a ordenación de apartamentos turísticos, vivendas turísticas e vivendas de uso turístico na Comunidade Autónoma de Galicia e que achega marco de seguridade, contribúe  a loitar contra a competencia desleal e  posibilita que os  concellos regulen este uso dá  vivenda.

O propio decreto xa recolle que os propios concellos no ámbito das súas competencias poden limitar o establecemento de vivendas de uso turístico se así o consideran.

Con la tecnología de Blogger.