Saliento a xuntanza mantida hoxe en Madrid na que a Xunta, o Ministerio
de Fomento e o Concello de Ourense concretaron a coordinación dos traballos
entre os distintos elementos que forman a primeira fase da estación intermodal
que se está a executar na cidade.
Nela participaron a conselleira de Infraestruturas e Mobilidade, Ethel Vazquez, xunto co
director xeral de Mobilidade, Ignacio Maestro, a presidenta de Adif, Isabel Pardo de Vera, e o alcalde de Ourense, Jesús
Vázquez, e abordaron os avances nesta infraestrutura.
Actualmente a Xunta de Galicia está a executar a estación de autobuses
integrada na terminal de ferrocarril, uns traballos que necesitan sincronizarse
coas obras de liberación de vías que executa Adif, así como co aparcadoiro
subterráneo, cuxa licitación vén de ser aprobada polo administrador
ferroviario.
A Xunta de Galicia manifestou hoxe a súa valoración positiva por este
paso adiante e solicitou que se axilice a contratación e execución do
aparcadoiro na medida do posible para facilitar así o desenvolvemento das obras
da estación de autobuses.
A primeira fase da estación intermodal da Ourense está formada pola
estación de autobuses e o aparcadoiro subterráneo, mentres que a liberación de
vías está a ser desenvolvida como parte dos traballos preparatorios para a
chegada dos trens AVE á terminal.
Na xuntanza de hoxe as tres administracións abordaron tamén o
anteproxecto sobre a reforma da estación de ferrocarril que Adif mantén
actualmente en proceso de información pública. A ese respecto, tanto o Goberno
galego como o Concello de Ourense solicitaron a Adif un compromiso de execución
do proxecto integral que foi acordado e que non está reflectido na súa totalidade
no deseño que se atopa en fase de información pública.
A Consellería de Infraestruturas e Mobilidade está a investir máis de 9
millóns de euros na estación intermodal de Ourense, que comezou o pasado mes de
setembro coas demolicións dos edificios situados na parcela. Esta nova terminal
de autobuses integrada no complexo intermodal deseñado por Norman Foster,
contará con 13 dársenas de operación e 3 de regulación e cun edificio de máis
de 700 m² construídos para albergar os diferentes servizos.
Impulso ao Ecobarrio
Na xuntanza de hoxe participou tamén a xerente do Instituto Enerxético de Galicia (INEGA), Zeltia Lado,
quen explicou que a estación intermodal de Ourense está integrada dentro do
proxecto do Ecobarrio que a Xunta de Galicia desenvolve na cidade de Ourense.
O proxecto do EcoBarrio
contempla a posta a punto de fachadas en envolventes térmicas en
edificios particulares e públicos, tales como centros de ensino ou a
futura estación intermodal que verá chegar o AVE, unha nova infraestrutura que,
ademais, poderá engancharse á rede de distribución de calor de orixe
xeotérmico; a substitución do alumeado actual por tecnoloxía LED tanto nos
edificios como nas rúas do barrio da Ponte con actuacións específicas de
alumeado arquitectónico na zona da Chavasqueira; o fomento da mobilidade
sustentable centralizada no parque móbil do Concello; e a posta en marcha
da Oficina do EcoBarrio para facilitar información e asesoramento aos veciños
sobre as axudas ás que poden acceder en materia de eficiencia enerxética.
Co EcoBarrio da Ponte quérese demostrar que existe outra forma de
facer urbanismo e outra forma de facer cidade: máis respectuosa co medio
ambiente e con maior calidade de vida para os veciños e veciñas.
Recibirá resposta
