Presentado o Libro Branco sobre o futuro de Europa que analiza como evolucionará a UE no próximo decenio

Tal e como se anunciou no discurso sobre o Estado da Unión pronunciado polo presidente Jean-Claude Juncker en 2016, a Comisión Europea presentou hoxe o Libro Branco sobre o futuro de Europa, que representa a contribución da Comisión ao Cume de Roma do próximo 25 de marzo de 2017.
Ao prepararse para celebrar o 60.º aniversario da UE, miramos cara atrás e vemos sete décadas de paz e unha Unión ampliada de 500 millóns de cidadáns que viven en liberdade nunha das economías máis prósperas do mundo. Ao mesmo tempo, a UE debe mirar cara ao futuro e considerar a maneira en que vai perfilar unha visión do seu porvir con 27 Estados membros.

O Libro Branco analiza de que forma evolucionará Europa no próximo decenio, desde a repercusión das novas tecnoloxías na sociedade e o emprego, ás dúbidas que suscita a globalización, os problemas en materia de seguridade e o ascenso dos populismos.

Expón a disxuntiva á que nos enfrontamos: ser varridos por estas tendencias ou asumilas e aproveitar as novas oportunidades que traen consigo. O peso demográfico e económico de Europa diminúe mentres outras partes do mundo crecen.

En 2060, ningún dos nosos Estados membros representará nin sequera o 1 % da poboación mundial, unha razón de peso que nos aprema a manternos unidos para conseguir máis resultados. Europa é unha forza positiva a nivel mundial; a súa prosperidade seguirá dependendo da súa apertura e a fortaleza dos vínculos cos seus socios.

O Libro Branco expón cinco escenarios, cada un dos cales ofrece unha visión do posible estado da Unión dos 27 en 2025 dependendo das opcións polas que se decante Europa (véxase o anexo). Os escenarios abarcan un amplo abanico de posibilidades e teñen carácter ilustrativo. Non son mutuamente excluíntes nin exhaustivos.

O Portavoz do PP e Vicepresidente primeiro do Grupo PPE no Parlamento Europeo, Esteban González Pons, pediu hoxe que a UE tome unida as decisións sobre o seu futuro e sobre a maneira de superar os desafíos que expón o Brexit e o aumento dos populismos e os nacionalismos.

"Chegou o momento de aliñar as expectativas coa realidade, de dicir o que Europa pode facer e non prometer o que non podemos facer. E é hora de defender Europa porque é a mellor vacina contra nacionalistas e populistas", dixo González Pons en nome do Grupo PPE durante o debate sobre o Libro Branco presentado hoxe pola Comisión Europea sobre o futuro da UE.

"Calquera que sexa o camiño que tomemos, debemos tomalo unidos e por consenso, porque estas dúas palabras déronnos 60 anos de paz. Podemos esquecer por que a unidade é tan importante, podemos esquecer que non hai alternativa á Unión", alertou González Pons.

"A pregunta é se queremos seguir avanzando. Eu quero avanzar, pero non podemos criticar a aqueles que non queren ir máis lonxe do que estamos agora, e chamarlles anti-europeos, porque Europa pertence a todos nós, non só a algúns", engadiu.

En canto aos cinco escenarios presentados pola Comisión Europea para afrontar o futuro da UE, González Pons explicou que "un sexto escenario é tamén posible, e consistiría na fusión dos outros cinco, porque non son mutuamente excluíntes".

"Ninguén debe esquecer que a Unión xa é o noso presente e agora temos que decidir que camiño queremos tomar no futuro" para facer fronte a desafíos comúns como a globalización, a brecha xeracional, o terrorismo, o cambio climático, a migración, a crise dos refuxiados, e o auxe do nacionalismo e o populismo, engadiu.

Sobre o Brexit (saída de Reino Unido da UE), o Portavoz do PP dixo que cando un país tan importante quere abandonar o proxecto común "debemos preguntarnos se se vai porque a paz xa está consolidada ou se se vai porque a paz xa non é tan importante", e asegurou tamén que a UE debe lograr que o Brexit sexa a última consecuencia dos erros que cometeu nos últimos anos.
González Pons subliñou tamén que "o debate sobre o futuro de Europa é necesario e o Parlamento Europeo debe participar plenamente nel desde agora, porque os europeos deben ser os donos do seu futuro".

Si desexa facer algún comentario poder enviar un correo a celso.delgado@congreso.es 
Recibirá resposta

Con la tecnología de Blogger.