Hoxe, ao termo da xuntanza do Consello da Xunta,
o presidente
Alberto Núñez Feijóo, avanzou hoxe a aprobación da implantación do bono de
alugueiro social para axuda ás persoas en situación de emerxencia social que
non poidan facer fronte ao pago da renda de alugamento.
Trátase
dunha medida, dixo, que contará cun orzamento de 3,3 millóns de euros para
garantir o custo do alugueiro de 750 vivendas anuais.
Segundo
detallou mediante este bono social, a Xunta concederá axudas para o pago do
alugueiro de ata 4.050 euros, a dividir ao longo de dous anos, a familias
afectadas por desafiuzamentos a causa do impagamento do alugueiro. De xeito
máis concreto, engadiu, o importe desta axuda será de 150 euros, que poderán
concederse como un bono mensual durante doce meses prorrogables por outros doce
ás familias beneficiarias sen que o importe poida superar o prezo do alugueiro.
Ademais, explicou, poderanse conceder outros tres bonos nun só pagamento
para facer fronte aos gastos derivados da formalización do novo contrato; en
concreto, a constitución de fianza e a alta de subministracións. Desta maneira
o número máximo de bonos a conceder a unha familia será de 27 nun período de 24
meses cun importe total máximo de 4.050 euros.
Feijóo sinalou que, ademais, este programa permite a posibilidade de
realoxamento dos afectados en vivendas xestionadas polo Instituto Galego de
Vivenda e Solo. E que, ao seu abeiro, poderanse realizar dous tipos de
intervención, en función de se a unidade familiar corresponde a un colectivo de
atención preferente ou non.
Así, no caso das unidades familiares incluídas nalgún colectivo de
atención preferente, como colectivos sociais desfavorecidos, vulnerables ou en
situación de exclusión social, o IGVS poderá realizar o realoxamento nunha
vivenda xestionada polo organismo, preferiblemente nas vivendas postas á
disposición da Xunta pola Sareb, polas entidades financeiras ou, no seu
defecto, nunha vivenda de promoción pública propiedade do IGVS.
Consideraríanse colectivos de atención preferente as familias numerosas
ou monoparentais con fillos a cargo, as familias con todos os seus membros en
situación de desemprego, ou as mulleres vítimas de violencia de xénero que
estean nesta situación cunha antigüidade máxima de 12 meses.
E por outra banda, tamén poderán acceder ás axudas do Programa bono de
alugueiro social as unidades de convivencia que non pertenzan a ningún destes
colectivos. Feijóo explicou que se trata, en definitiva, de familias que xa
teñen data de desaloxamento da súa vivenda alugada.
As axudas do bono de alugueiro social van dirixidas a unidades familiares ou de
convivencia con ingresos familiares ponderados que non superen 1,5 veces o
Iprem, o que supón entre 745,51 euros mensuais para unha soa persoa e 1.553,15
euros mensuais para unha familia con cinco membros ou máis.
Inicialmente, proseguiu, o programa estará dotado con 3,3 millóns de
euros ampliables en función das necesidades que se vaian albergando, que
permitirán dar cobertura á totalidade dos desafiuzamentos por impagamento de
alugueiro que se produzan e que cumpran os requisitos establecidos.
Explicou así que con este diñeiro “poderemos afrontar o custo de 750
vivendas anuais e, polo tanto, poñemos á disposición das familias con
dificultades, -ademais das vivendas en propiedade de entidades financeiras, das
propias do IGVS-, 750 vivendas adicionais das que a Xunta de Galicia se
compromete a financiar o alugueiro mensual por un importe de 150 euros ao mes”.
O bono social, agregou, percibirao directamente o arrendador, de tal
xeito que ten a obriga de non lanzar o inquilino por impagamento da renda.
Garantir o dereito á vivenda
O titular da Xunta salientou que esta medida amplía outras como os programas
Reconduce e Realoxa, tamén para persoas en risco de desafiuzamento por falta de
pagamento do alugueiro. E ao respecto, apuntou que se crearán catro oficinas
máis, unha en cada provincia, que se sumarán á que xa funciona en Santiago.
Mencionou, na mesma liña, o Rexistro de Vivendas Baleiras, presentado
onte mesmo e que permitirá contar cun censo de posibles vivendas que ofrecer a
afectados por desafiuzamentos. E, igualmente, destacou o proceso de diálogo
aberto con distintas entidades financeiras, como Abanca ou Caixa Rural Galega,
para que nos casos de desaloxamento por impagamento de hipotecas as familias
afectadas poidan permanecer na mesma vivenda; e para garantir un paquete
importante de vivendas baleiras destas entidades coas que dar cobertura a estas
persoas.
Si desexa facer algún comentario poder enviar un correo a celso.delgado@congreso.es
Recibirá resposta