martes, 20 de enero de 2015

O FMI aumenta as previsións de crecemento de España para 2015 ao 2%

Hoxe coñecemos que o Fondo Monetario Internacional na actualización de xaneiro do seu informe WEO apunta que a proxección do crecemento mundial apunta a un aumento moderado en 2015-16, de 3,3% en 2014 a 3,5% en 2015 e 3,7% en 2016 (véxase o cadro). Isto representa unha revisión á baixa de 0,3% en ambos os dous anos en comparación coa edición de outubro de 2014 de Perspectivas da economía mundial (WEO).

Diversos factores recentes, que afectaron a distintos países de diferentes maneiras, moldearon a economía mundial dende a publicación da edición de outubro do informe WEO, afirma o informe: Os novos factores que avalan o crecemento -a caída dos prezos do petróleo, e tamén a depreciación do euro e do ien- están máis que compensados por forzas negativas persistentes; entre elas, as secuelas que deixou a crise e a diminución do crecemento potencial en moitos países".

"A nivel dos países, a contracorrente complica as cousas", sinala Olivier Blanchard, Conselleiro Económico e Director do Departamento de Estudos do FMI. É algo "positivo para os importadores de petróleo e negativo para os exportadores de petróleo. Positivo para os importadores de materias primas e negativo para os exportadores. Continúa a loita para os países cicatrizados pola crise, e non para outros. É algo positivo para os países máis vinculados ao euro e ao ien, e negativo para os que están máis vinculados ao dólar".

Nas economías avanzadas, proxéctase que o crecemento aumentará a 2,4% en 2015 e en 2016. Non obstante, este panorama sen grandes cambios oculta a crecente diverxencia entre Estados Unidos, por un lado, e a zona do euro e Xapón, polo outro.


Neste informe do FMI,  EUA aparece como o único país desenvolvido que se está a recuperar con fortaleza. No caso da zona euro, o FMI augura que a actividade para os dous próximos exercicios estará soportada polo menor prezo do cru, unha política monetaria mais laxa e a depreciación da moeda única. Pero estes factores, non obstante, veranse neutralizados por un investimento máis débil e un menor crecemento dos emerxentes, o que afectará ao ritmo exportador.


Todos os grandes países da zona euro crecerán menos que o previsto en outubro, coa excepción de España. Será a economía do euro que máis crecerá este ano e o que vén, cunha previsión do 2% e do 1,8%, respectivamente. Entre as nacións desenvolvidas tan só EUA (3,6%), Reino Unido (2,7%) e Canadá (2,3%) crecerán máis que España en 2015.

A vicepresidenta do Goberno, Soraya Sáenz de Santamaría, fixo énfase no respaldo dado polo FMI neste informe "ao programa de reformas feito" polo Goberno de Mariano Rajoy en España. A revisión á alza das previsións de crecemento para o noso país, o único da lista xunto con EUA que non baixa, supoñen para Sáenz de Santamaría "unha boa noticia que xera confianza" e que, ademais, vén a constatar que "a senda que emprendemos é a correcta".

En conclusión, moi boas previsións que obedecen a que hai un goberno firme que ten estabilidade e que implementar un plan fronte á crise, o que nos permitiu que mentres hoxe outros analizan por que lles van mal as cousas, nós sabemos que o camiño que emprendemos é o correcto.

Si desexa facer algún comentario poder enviar un correo a celso.delgado@congreso.es 
Recibirá resposta