Lembremos que o Grupo dos 20 é un foro de 19
países, máis a Unión Europea, onde se reúnen regularmente, dende 1999, xefes de
Estado (ou Goberno), gobernadores de bancos centrais e ministros de finanzas.
Está constituído por sete dos países máis industrializados -Alemaña, Canadá,
Estados Unidos, Francia, Italia, Xapón e Reino Unido- (GR-7), máis Rusia
(GR-8), máis once países recentemente industrializados de todas as rexións do
mundo, e a Unión Europea como bloque económico.
É un foro de cooperación e consultas entre os países en temas relacionados co
sistema financeiro internacional. Estuda, revisa e promove discusións sobre
temas relacionados cos países industrializados e as economías emerxentes, co
obxectivo de manter a estabilidade financeira internacional, e de encargarse de
temas que estean máis alá do ámbito de acción doutras organizacións de menor
xerarquía.
Ao finalizar este cumio e en rolda
de prensa, o presidente Mariano
Rajoy dixo que os instrumentos para crecer con máis enerxía e de
xeito máis harmónico en todo o mundo son as reformas estruturais e as políticas
de apoio ao investimento e o consumo.
Nesta liña sitúase o Plan de Acción aprobado co "ambicioso" obxectivo
de engadir un dous por cento ao crecemento conxunto das economías dos países
membros ata 2018. Para logralo son necesarias reformas estruturais que animen o
investimento, estimulen a creación de emprego, aumenten a competencia e
fomenten o comercio.
A formulación do GR-20 coincide, sinalou Rajoy, coa política económica do Goberno
de España, reformas estruturais e reforzo das políticas macroeconómicas en
Europa, pois, ao seu xuízo, é preciso que Europa e o conxunto do mundo coordine
as súas políticas para saír con forza da crise.
A experiencia española e as súas reformas, coas que o presidente abriu a primeira
sesión plenaria do GR-20, foron vistas en todo o mundo "como un exemplo de
superación, como un modelo de sociedade capaz de dar a volta a unha situación
moi difícil", dixo Mariano Rajoy,
quen engadiu que en "todo o mundo se pon de exemplo o caso de España, e
iso é algo que nos debe de encher de satisfacción a todos" e que favorece
"a imaxe e no crédito internacional do noso país".
Outro dos asuntos de "máxima importancia"
tratado no cumio foi a cuestión tributaria referida á evasión fiscal. Ao
respecto, Mariano Rajoy
anunciou que España "será un dos primeiros países en aplicar o intercambio
automático de información fiscal previsto no plan elaborado polo GR-20"
porque "a loita contra a fraude é un obxectivo moral e un obxectivo
económico" e "é máis obrigado perseguir a fraude cando o conxunto da
sociedade está a facer tantos esforzos para superar a crise". O fin
último, segundo puxo de manifesto, é "que non haxa ningún lugar no mundo
onde poida refuxiarse a riqueza que non tributa".
O Cumio, segundo Rajoy,
tamén serviu para dar un impulso ás negociacións comerciais multilaterais,
avanzar no reforzo da regulación financeira e na colaboración en materia de
enerxía e cambio climático. Ademais, fíxose un chamamento á comunidade
internacional para redobrar os medios na loita contra o ébola. En relación co emprego, a
redución do desemprego xuvenil se sinalado como obxectivo prioritario,especificóu.
Recibirá resposta
Recibirá resposta