No faladoiro de Radio Voz

Intervín esta mañá no habitual faladoiro de Raio Voz que modera Antía Díaz Leal. Primeiramente falamos das novidades que se produciron na instrución da operación Zeta xa que o titular do Xulgado de Instrución número 6 da Coruña ampliou o número de imputacións a un total de 31 persoas.

Sobre este particular dixen que estas dilixencias penais teñen causa en boa parte na actuación inspectora da Xunta que en 2012 trasladou á Fiscalía a información sobre posibles irregularidades.

E que corresponde agora á Xustiza determinar as responsabilidades dos tres ex altos cargos da Consellería de Traballo que xa foron destituídos e dos vinte e oito restantes cidadáns imputados.

Recordei que mentres haxa unha investigación xudicial non procede que haxa outra investigación en paralelo en sede parlamentaria ou mediática e que a colaboración da Xunta coa Xustiza e máxima.

Logo falamos da decisión da Xunta de Fiscais de Sala de expresar o seu apoio de forma moi maioritaria a favor da ratificación de formular querela polo chamado proceso de participación cidadá do pasado 9 de novembro.

Dixen que con respecto escrupuloso á Lei se cumpriron as previsións do Estatuto Orgánico do Ministerio Fiscal, ante a discrepancia formulada polo Fiscal Superior de Cataluña a cumprir coa orde formulada polo Fiscal Xeral do Estado.

Recordei que a Fiscalía Superior de Cataluña iniciou o pasado 8 de novembro Dilixencias de Investigación ante a realización de actos (cesión de locais públicos, elaboración de papeletas, distribución de urnas, etc...) por parte do Goberno da Generalitat de Cataluña contrarios á suspensión preventiva ditada polo TC.
Pero malia todo a consulta se celebrou e o propio 9-N celebrouse a consulta e a Fiscalía informou nas diferentes denuncias cidadás a favor da admisión a trámite de todas elas por entender que existían indicios racionais de delito.

Ao termo do proceso de participación cidadá, a Fiscalía Xeral do Estado actua en Dereito e con total independenica e anuncia a presentación dunha querela dirixida contra o president catalán, o vicepresidente, Joana Ortega, e a conselleira de Educación, Irene Rigau.

Querela que dará lugar a un procedemento xudicial con todas as garantías e no que veremos que recorrido teñen as imputacións de comisión de presuntos delitos de desobediencia, prevaricación, malversación e usurpación de funcións.

Rematei recordando as palabras de onte de Rajoy no Congreso cando dixo, respondendo na sesión de control a Pedro Sánchez, que “imos seguir colaborando e dialogando coa Generalitat e con outros Gobernos autonómicos para resolver, como fixemos nos últimos anos, os duros efectos da crise, co Fondo de liquidez autonómica e o Plan de pagamento a provedores, que permitiron atender os vencementos de débeda e pagar os servizos públicos e aos provedores da Generalitat" 

E que engadiu: "vou dialogar coa Generalitat, como con calquera outro Goberno autonómico, sobre os temas que sexan de interese dos cidadáns -o señor Mais remitiu un documento non fai moitas datas sobre o que estou disposto a falar" se ben puxo como condición que non falaría sobre "algo que poida liquidar a soberanía nacional, que pretenda establecer o dereito de autodeterminación ou que afecte á igualdade dos españois, porque esas posicións non as podería aceptar de ningunha das maneiras".

Finalmente falamos da polémica en torno á xustificación das viaxes dos Deputados. Nese sentido informei que onte o Boletín Oficial do Congreso dos Deputados publica unha Resolución da Presidencia que establece medidas de control, supervisión e publicidade dos desprazamentos dos Deputados.

Expliquei esta norma que pódese consultar vendo este link:

http://www.congreso.es/public_oficiales/L10/CONG/BOCG/D/BOCG-10-D-562.PDF