Esta semana coñeciamos o Informe Mensual de Comercio Exterior correspondente ao mes de maio, e tamén o dato de que nos
primeiros cinco meses do ano, as exportacións españolas aumentaron un 0,8%
interanual, ata a cantidade de 98.664,0 millóns de euros, novo máximo na serie
histórica (dende 1971).
Os resultados acumulados para España mostraron o bo
comportamento das exportacións nacionais en comparación coas dos nosos
principais socios comerciais. Así, as exportacións superaron o comportamento das
exportacións francesas (-2,3%) e as de Reino Unido (-14,1%), aínda que se
situaron por debaixo das alemás (2,6%). Fóra da UE,
as exportacións de Estados Unidos creceron un 3,0% mentres que as de Xapón
continuaron co seu crecemento, do 4,4%, nos cinco primeiros meses de
2014.
Pola súa banda, as importacións sumaron 109.069,4 millóns de euros,
cunha suba do 5,3% respecto ao mesmo período do ano 2013. Este crecemento das
importacións está en boa medida motivado pola tendencia de mellora da demanda
interna.
Nos cinco primeiros meses de 2014, o déficit comercial alcanzou os
10.405,4 millóns de euros (déficit de 5.717,7 millóns en xaneiro-maio de 2013).
O superávit non enerxético rexistrou a cifra de 7.179,5 millóns de euros e o
déficit enerxético reduciuse un 2,3% ata os 17.584,8 millóns de euros. A taxa de
cobertura situouse no 90,5%, 4,0 puntos inferior á do mesmo período do ano
pasado (94,5%).
Este repunte das importacións coincidindo cunha caída nas
exportacións pola menor demanda dos mercados emerxentes, é un problema que non
favorece a recuperación.
Onte dicía FUNCAS que
"a economía española necesita elevar a súa taxa de investimento para afianzar o
potencial de crecemento e a creación de emprego, pero este investimento debe
financiarse con aforro interno e non con máis débeda externa. Polo tanto, a
política económica debería potenciar as exportacións máis que o consumo e
progresar na redución dos desequilibrios do sector público para elevar a capacidade de aforro
do conxunto da economía"
Agardemos a ver a evolución dos vindeiros meses.
