Allegue reivindica que Galicia quere a transferencia da AP-9, pero “sobre a base da vontade expresada na Cámara, non a calquera prezo”

Onte no Parlamento de Galicia a conselleira de Vivenda e Planificación de Infraestruturas, María Martínez Allegue en resposta a unha pregunta, esixiu volver ao acordo do Parlamento para permitir a viabilidade da transferencia da AP-9 e reivindicou que “Galicia quere a transferencia, pero sobre a base da vontade expresada na Cámara, non a calquera prezo”. 

Explicou que o texto proposto como alternativa polo BNG e o PSdG “deixa fora aspectos moi importantes que suporían un enorme lastre para os galegos”. Detallou que non prevé que o Estado asuma a supresión da aplicación do incremento de tarifa do 1% acumulativo anual , unha carga “inxusta” para os usuarios.

 

Lamentou que no texto alternativo desaparece a obriga do Estado de asumir futuras actuacións e  investimentos na AP-9; e ademais non aparece a dotación a Galicia dos medios económicos necesarios para ampliar as bonificacións a usuarios recorrentes a futuro.

 

Apuntou que “o texto elimina as obrigas económicas do Estado no caso de nulidade das prórrogas pola UE”.

 

Neste sentido, a conselleira reivindicou que “se deixe o texto como estaba, como o acordou esta Cámara”.

 

Ademais lembrou que a transferencia da AP-9 debe vir acompañada dos recursos económicos necesarios para a súa xestión e manter todos os compromisos adquiridos, tal e como constaba no acordo no Parlamento Galego que impulsou a Proposición de Lei Orgánica do Congreso.

 

Detallou que dos 231 M€ que ingresou a concesionaria en 2025 pola AP-9, 145 M€ procederon dos usuarios e os restantes 86 M€ ao pago de bonificacións do Estado, é dicir, “un 63% que pagan os usuarios  fronte a un 37% de bonificación do Estado, que pagan os españois”.