O Parlamento de Galicia demanda celeridade para dar solución ao problema xerado tras o colapso do viaduto da A-6

O Parlamento de Galicia aprobou onte por unanimidade a proposición non de lei do Grupo Popular a través da que se solicita ao Goberno de España que actúe con toda a celeridade posible para dar solución ao problema xerado tras o colapso e peche á circulación do viaduto do Castro na Autovía do Noroeste, unha das principais vías de entrada e saída de Galicia á Meseta. 

Así mesmo, pídese que concrete as iniciativas dirixidas a revisar, inspeccionar e garantir a seguridade e funcionalidade dos viadutos da Autovía do Noroeste e da integridade desta infraestrutura viaria, ao tempo que ofrece información de xeito continuo e coa máxima transparencia para manter ao tanto das novidades aos cidadáns, concellos afectados e á administración autonómica, en aras de evitar posibles especulacións e desconfianzas.

O portavoz popular de Infraestruturas, José Manuel Balseiro, lembrou as palabras do director xeral de Estradas do Goberno central nas que cualificaba este incidente na A-6 de “colapso sen precedentes na rede viaria española”. “A principal entrada a Galicia pola Meseta, cunha circulación media de 10.000 vehículos diarios continúa pechada, e o desvío provisional que implica a circulación pola N-6 supón un incremento do tempo da viaxe e un aumento de custes para os transportistas”, apuntou.

Balseiro lembrou que o viaduto permanecía pechado desde hai máis de un ano e estaban acometéndose nel obras de urxencia, ao detectarse danos estruturais na infraestrutura. “Unhas actuacións de emerxencia ás que se destinaron 26 millóns de euros de fondos públicos, un investimento moi importante que, visto o resultado, non entendemos a que se dedicou”, dixo.

COLABORACIÓN DA XUNTA

“A día de hoxe, son todo especulacións sobre o que aconteceu, porque desde o Ministerio de Transportes non se deu ningunha explicación sobre as causas que provocaron o sinistro, nin tampouco se deu información sobre como se vai acometer a resolución do problema e, moito menos, os prazos que se barallan para que a autovía poida volver a estar operativa neste punto”, lamentou.

José Manuel Balseiro asegurou que “nin a Xunta nin o PPdeG buscamos facer deste gravísimo accidente unha causa de confrontación política”, e mostra disto é que a Consellería de Infraestruturas xa remitiu ao Ministerio de Transportes unha proposta con tres alternativas para poder axilizar o tráfico na zona mentres non se atopa unha solución definitiva.