Na preestrea da película "Cuñados", unha comedia integramente rodada en Ourense

 

Asisto onte no cine Callao de Madrid a preestrea da película "Cuñados", unha comedia integramente rodada en Ourense.

É a primeira longametraxe da produtora galega Portocabo e ópera prima do director Toño López, unha comedia de enredo que relata as peripecias delituosas de tres cuñados unidos polo azar e embarcados nun disparatado plan.

O elenco artístico está integrado, como actores principais, por Xosé Antonio Touriñán, Miguel de Lira e Federico Pérez Rey, xunto coas actrices Eva Fernández, Iolanda Muíños, e María Vázquez. A Deputación de Ourense colabora neste proxecto cinematográfico xunto coa Axencia Galega das Industrias Culturais (Agadic), RTVE, Televisión de Galicia e a denominación de orixe Ribeiro. 

Ten como escenario a cidade de Ourense e diversos lugares da provincia, ofrecendo ao equipo de rodaxe localizacións ideais para un traballo no que conviven o rural e o urbano, o moderno e o tradicional, ademais da súa gran vida social e cultural. Con este traballo, realizado integramente en galego, Portocabo escolleu de novo Ourense como plató para as súas producións, como así fixo coa serie Vidago Palace emitida na TVG, na RTP e na plataforma HBO. 

Esta comedia galega narra as peripecias de Eduardo (Miguel de Lira) e o seu cuñado Sabonis (Xosé A. Touriñán), que acaban de meter a pata nun dos seus negocios e necesitan moito diñeiro. Sabonis atopa a solución ao problema secuestrando a Modesto (Federico Pérez Rey), cuñado de Alicia Zamora, a empresaria que os enganou e deixou tirados. Pero Alicia non pensa pagar nin un euro polo seu cuñado. Con todo, é o propio Modesto quen idea un novo plan co que Eduardo e Sabonis poderán salvar a adega familiar. Estes tres cuñados téñeno todo para fracasar, pero como diría Sabonis, “malo será”. 

Na estrea estivo presente Manuel Baltar, presidente da Deputación de Ourense, entidade que colaborou economicamente no desenvolvemento deste proxecto cinematográfico, o alcalde de Madrid, José Luis Martínez-Almeida, e a vicepresidenta do Goberno Yolanda Díaz. 

Gustoume moito a longametraxe, é unha comedia moi divertida, cun guión moi logrado. Os actores son magníficos e está moi ben dirixida. Ademais que fóra en versión orixinal en galego e que transcorra a acción na provincia de Ourense e noutras localizacións da provincia preferentemente na comarca do Ribeiro, faia mais atractiva.

Seguro que terá moita aceptación entre o público nas salas comerciais, grazas á alianza con Fílmax, xa que acadará unha distribución sen precedentes para unha película galega pois a partir do 9 de abril proxectaranse 100 copias do filme noutras tantas salas de toda España.

Con la tecnología de Blogger.