Galicia iniciará a década xacobea coa Catedral de Santiago restaurada, unha das maiores actuacións feita nun patrimonio mundial nos últimos anos

 

Onte tivo lugar e o acto de presentación das obras de restauración da Catedral de Santiago.

O presidente da Xunta, Alberto Núñez Feijóo aseverou que este proxecto, que comezou en 2009 coa aprobación do Plan director do conxunto catedralicio, iniciouse como un reto de país e converteuse nun éxito colectivo tanto a nivel técnico como de xestión. “Un éxito técnico grazas ao labor de todos os profesionais que participaron nel; e un éxito de xestión grazas ao impulso conxunto do Arcebispado, o Cabido, a Fundación Catedral, e as Administracións que unimos forzas”, dixo, incidindo en que este traballo é resultado dun esforzo constante, diario e colectivo.

Nesta liña, salientou o impulso que en 2015 experimentou este proceso de conservación, a través dun convenio de colaboración coa Administración xeral do Estado. “Grazas a este financiamento incluíronse 18 actuacións das cales a maior parte estarán rematadas antes de que acabe o ano”, aseverou, referíndose tamén ao convenio asinado pola Xunta neste 2020 para dar continuidade á iniciativa.

Feijóo resaltou que a través das distintas fases recuperouse o esplendor das fachadas e acometeuse o complexo reto das cubertas; “e no interior é evidente o resultado dos traballos realizados que recuperaron a luz e as cores que o tempo escurecera”, dixo.

Así mesmo, lembrou que a conservación da Catedral foi capaz de convocar tamén á toda a sociedade, a través de distintas entidades como a Fundación Barrié, que foi determinante para levar a cabo a recuperación do Pórtico da Gloria, ou Iberdrola, que apostou por dotar ao templo dun novo sistema de iluminación que enxalza o seu interior.

Se ben a pandemia condiciónao todo, e tamén o Ano Santo que comezará nuns días, o titular da Xunta asegurou que o Xacobeo 2021 será distinto a como se imaxinou e preparou, pero seguirá sendo “especial”. “España, Europa e o mundo están convocados a participar, cos requisitos obrigados polas circunstancias do momento, no Xacobeo 2021”, remarcou.

O presidente do Goberno galego concluíu asegurando que, ademais da restauración visible, hoxe celébrase outra menos evidente, “pero que podemos percibir todos, cando xa estamos ás portas do Xacobeo 2021”, afirmou, referíndose aos valores que encerran estas pedras e que inspiraron á humanidade que se deu cita nesta catedral.


“Hai unha mensaxe permanente que sae deste recinto e se activa en especial en encrucilladas dominadas pola incerteza. Esa mensaxe dinos que as mesmas mulleres e os mesmos homes que fixeron que Galicia pasara de ser o fin do mundo ao principio, poden sobrepoñerse e triunfar sobre o infortunio. Xa o estamos facendo e, como noutras probas igual de duras, contamos coa cobertura da nosa catedral”, rematou.

Que, satisfacción ver esta Carderal restaurada. Parabéns a todos.




 

 

Con la tecnología de Blogger.