Inaugurado o novo edificio do Campus da Auga en Ourense


Onte o campus de Ourense viviu un día importante coa inauguración polo  presidente da Xunta, Alberto Núñez Feijóo, do novo edificio do Campus da Auga en Ourense que será o centro de referencia de todo o noroeste peninsular para o coñecemento vinculado á auga.
A nova infraestrutura, financiada con case 4,5 millóns de euros pola Xunta de Galicia con Fondos Feder, albergará 16 laboratorios de investigación e da Escola de Enxeñaría Aeronáutica e do Espazo e centralizará os servizos administrativos deste campus.
Neste acto Feijóo destacou que, nos últimos meses, foise avanzando no cumprimento das liñas estratéxicas do campus: coa posta en marcha do programa de doutorado do Campus da Auga; coa apertura do programa de fomento da innovación, con premios para recoñecer accións relevantes no eido da investigación, a innovación educativa, a transferencia do coñecemento e a divulgación científica; e coa creación da unidade de transferencia de tecnoloxía e coñecemento e do programa de emprendemento e creación de empresas.
Así mesmo, lembrou a posta en marcha dunha unidade de investigación de excelencia, que implica a Universidade, a empresa e a Administración, dun clúster centrado no medio ambiente e a alimentación e doutro centrado en innovación, xestión dos recursos hídricos e na auga como recurso turístico e cultural.
“Este campus nace sen fronteiras e con todas as portas abertas para os ourensáns e para todos os galegos”, dixo, recordando que o Goberno galego investiu preto de 4,5 millóns neste edificio. Unha contía que, sumada ás achegas destinadas ao desenvolvemento doutras accións de I+D+i do Campus da Auga, ascende a un investimento total de 7 millóns de euros.
O presidente da Xunta aseverou que a apertura desta sede será o mellor dos estímulos para os retos que aínda quedan por cumprir: potenciar a mobilidade de estudantes de doutorado e investigadores; organizar o III Congreso internacional da Auga, que se celebrará no mes de outubro; abrir novas liñas de investigación; e comezar a traballar na oferta académica do campus, que deberá responder ás necesidades da sociedade ourensá.
Nesta liña, incidiu en que os beneficios do Campus da Auga se estenderán moito máis alá das paredes deste novo edificio, ata os diferentes actores da sociedade galega. “Estamos ante unha grande oportunidade para todos; para a comunidade universitaria, para os alumnos, para a Xunta, para as empresas da zona e para Ourense”, dixo, ao que engadiu que esta oportunidade supón unha aposta plena polo traballo conxunto que caracterizou este proxecto desde que se comezaron a escribir as liñas do seu plan estratéxico.
“O que inauguramos hoxe, é un proxecto académico, social, económico e industrial; unha mensaxe de futuro para a provincia”, abundou.
Salustiano Mato, reitor en funcións da Universidade de Vigo, destacou como supón “un enorme salto cualitativo para Ourense e para o noso campus, un salto cualitativo que significa fabricar futuro”. Engadíu que “para min, como reitor da Universidade de Vigo, é un auténtico honor e unha sorte que o meu último acto de singradura como reitor sexa a posta de largo do Campus da Auga en Ourense” e explicou como “esta infraestrutura dalgunha maneira visibiliza todo o traballo que fixemos neste campus entre todos e todas”, agradecendo tamén á Xunta de Galicia o traballo a prol da especialización dos campus como “unha maneira de facer o Sistema Universitario de Galicia máis eficiente”.
Jesús Vázquez, alcalde de Ourense, subliñou como “a cidade de Ourense recibe con moitísimo entusiasmo este novo edificio”. Estamos, afirmou, “ante un novo aliado no proxecto do futuro que deseñamos desde a cooperación institucional”,  e recalcou que é “unha especialización que vai xerar de seguro un valor engadido e estratéxico para toda a cidade, a provincia e mesmo para Galicia”, facendo fincapé no potencial termal ourensán. 
Parabéns especiais a Jesús Vázquez Abad que sendo conselleiro de Cultura, Educación e Ordenación Universitaria da Xunta impulsou decididamente que o Campus da Auga estivera en Ourense e que este edificio fora proxectado.
Neste sentido quero lembrar como o 14 de marzo de 2014 asistía na sé da Confederación de Empresarios de Ourense, ao acto no que se asinaba o protocolo de colaboración coa Universidade de Vigo para a creación do que sería Campus Auga, o primeiro especializado do Estado.

Alí o Conselleiro Jesús Vázquez Abad afirmaba que era “a primeira iniciativa de especialización dun campus non central do Sistema Universitario de Galicia (SUG), o que fai do de Ourense un campus líder en temáticas da auga con capacidade para expandir a súa plataforma de investigación e innovación e para obter novas fontes de financiamento que aseguren o seu papel na comunidade internacional da educación superior e a súa sustentabilidade a longo prazo”.

E recordaba que “para a realización deste novo espazo universitario centrado no mundo da auga, o custo estimado para esta infraestrutura estratéxica para o desenvolvemento da cidade, do Sistema Universitario e das I+D+I galegas, ascende a 4,5 millóns de euros”.

14.3.2014 (Foto Regal .Faro de Vigo)
E engadía Vázquez Abad sobre a futura construción de 4.000 metros cadrados, que “tan pronto estea solucionada a situación dos terreos, firmarase un convenio específico para a construción do edificio que albergará a sede institucional do Campus da Auga e unhas modernas infraestruturas dedicadas á investigación neste ámbito temático multidisplinar”.

Naquel acto o Conselleiro Jesús Vázquez Abad e o reitor da Universidade de Vigo, Salustiano Mato, asinaron un protocolo de colaboración para implementar o plan estratéxico do Campus Auga en Ourense a través de convenios que desenvolverán cada un dos puntos de dito documento.

Grazas polo tanto a ambos protagonistas que traballaron arreo para para establecer en Ourense un campus líder en temáticas da auga con capacidade para expandir a súa plataforma de investigación e innovación e para obter novas fontes de financiamento que aseguren o seu papel na comunidade internacional de educación superior e a súa sostenibilidade a longo prazo.

Si desexa facer algún comentario poder enviar un correo a celso.delgado@congreso.es 

Recibirá resposta.


Con la tecnología de Blogger.