Presentación da conexión ferroviaria entre Ourense e Lugo

O pasado 7 de maio celebrouse en Lugo unha importante reunión na que Ministro de Fomento, Íñigo de la Serna, en presenza do presidente Alberto Núñez Feijóo, da alcaldesa de Lugo e doutras autoridades presentou as actuacións previstas para a conexión ferroviaria  entre Ourense e Lugo. 

Comezou a presentación cunha valoración da situación actual do traxecto actual entre Ourense-Monforte de Lemos-Lugo. 

Ten 117 km e divídese en dous tramos diferenciados: Ourense-Monforte de Lemos de 46 km con vía única electrificada e Monforte de Lemos-Lugo de 71 km e vía única sen electrificar e que inclúe a variante da Pobra de San Xiao. Conta cun amplo conxunto de estruturas: 73 Pontes, 8 Túneles, 94 Desmontes e 56 Terrapléns. 

Explicou logo as actuacións que están en desenvolvemento:

INFRAESTRUTURA: Actuacións a levar a cabo: •Adecuación e reforzo, se procede, das pontes •Redefinición do resto de estruturas. 

•Análise dos túneles existentes para a intervención na súa adecuación, reforzo e adecuación de gálibos •Tratamento das trincheiras

•Tratamento de reparación ou reforzo do terraplén.

Situación actual: Encargada a redacción do proxecto: 1,7 Mill€

VÍA: Renovación da superestrutura de vía no trazado completo actual Ourense-Monforte de Lemos-Lugo. Situación actual: proxecto en redacción.

SUPRESIÓN E PROTECCIÓN DE PASOS A NIVEL: Deberanse suprimir os 36 pasos a nivel (30 pasos na liña Palencia-A Coruña e 6 pasos en liña Monforte-Vigo).Para iso poderanse poñer en marcha diferentes solucións: •Acondicionamento de camiños

•Construción de pasos superiores e inferiores

•Construción de pasarelas ou pasos inferiores peonís

•Concentración de camiños para permitir a supresión de varios pasos cunha única actuación de permeabilidade transversal á vía.

Situación actual: en fase de adxudicación o expediente para redacción de proxectos (9 lotes): 2.257.600 € (sen IVE)

ELECTRIFICACIÓN: Actuacións a realizar:

•Fase1.Ourense-Monforte de Lemos-Lugo. Electrificación entre Monforte de Lemos e Lugo con sistema de alimentación 2x25 kVc.a. Instalación de catenaria polivalente entre Ourense e Monforte de Lemos con posta en servizo inicial a 3 kVc. c.

•Fase2.Ourense-Monforte de Lemos- Cambio de sistema de alimentación de 3 kVc. c. a 2x25 kVc.a. Esta actuación realizaríase para, despois dunha planificación a nivel global das diferentes liñas, unificar o sistema eléctrico da rede galega Situación actual: proxectos en fase de redacción Investimento económico previsto para a renovación e electrificación . Tramo: Ourense–Monforte de Lemos–Lugo, Total investimento: 283 m€

VARIANTES DE TRAZADO: Está a desenvolverse o estudo informativo para definir as mellores alternativas en dous ámbitos:

•No tramo entre Ourense e Monforte de Lemos, a VARIANTE DE OS PEARES – CANABAL: As alternativas que contemplan vía dobre son catro e van desde os 640 millóns aos 692 millóns de euros de orzamento.

•No tramo entre Monforte de Lemos e Lugo, a VARIANTE DE RUBIÁN. As alternativas que contemplan vía dobre son dúas e van desde os 567 millóns aos 590 millóns de euros de orzamento.

INVESTIMENTO TOTAL ESTIMADO NA CONEXIÓN OURENSE-MONFORTE DE LEMOS-LUGO: Prevese un investimento variable entre 1.189,33 millóns de euros e 1.674,33 millóns de euros.

Neste acto de presentación, o presidente da Xunta, Alberto Núñez Feijóo, destacou que a nova conexión ferroviaria que comeza a desenvolverse entre Lugo, Monforte de Lemos e Ourense, a través dunha folla de ruta coñecida en detalle, reflicte o compromiso real, con prazos e con orzamentos concretos, coa chegada da alta velocidade ferroviaria a Lugo, a través dun investimento de máis de 1.000 millóns de euros.

“Estamos a falar dunha completa planificación que acredita a realidade con proxectos tecnicamente definidos e obras valoradas e recollidas en orzamentos que aseguran a súa viabilidade máis alá do papel”, aseverou.  É sobre todo un compromiso palpable, un tren en marcha que circula xa a través da variante da Pobra de San Xiao de Láncara e que supón o pistoletazo de saída á renovación da liña de ferrocarril entre Lugo e Ourense, explicou, engadindo que esta actuación incidirá na comodidade, na velocidade dos percorridos e na seguridade, coa eliminación dos pasos a nivel.

E confirma, ademais, a vontade de mellorar a conexión con Madrid que comezou xa cun incremento de frecuencias entre Lugo e a capital de España que se traduciu nun aumento de viaxeiros de case do 40%.”

Cohesión territorial da Galicia interior

Durante a presentación da conexión ferroviaria, Feijóo incidiu en que estender ata a provincia e a cidade de Lugo os beneficios do AVE, a través dunha liña actual e competitiva supón, tamén, un novo paso no obxectivo da cohesión territorial da Galicia interior.

Ao longo da súa intervención, o presidente da Xunta recordou que con ese obxectivo da Galicia global, “tan unida por dentro ben conectada por fóra”, os gobernos central e galego están a traballar conxuntamente para impulsar melloras na rede viaria tan importantes como: a Autovía do Cantábrico, en vías xa de solucionar os problemas derivados da néboa no Alto do Fiouco; ou a Autovía Santiago-Lugo que ten xa todos os seus treitos en obras ou en servizo; a vía de altas prestacións entre Lugo e Sarria, en cuxo desdobramento xa se empezou a executar; ou a conexión entre Celeiro e San Cibrao que continúa a desenvolverse na Mariña, agora coa súa extensión ata Viveiro.

Un conxunto de actuacións que certifican un compromiso coas comunicación desta provincia que debe continuar para garantir unha óptima conexión entre Lugo e Ourense tamén por estrada, como acontecerá coas actuacións anunciadas na estrada N-540.

Feijóo concluíu avanzando que, en canto o Goberno local de Lugo traslade a súa conformidade, se subscribirá o convenio para, entre as tres administracións, impulsar conxuntamente a estación intermodal que situará esta cidade nas mellores condicións para conectarse coa alta velocidade.

Si desexa facer algún comentario poder enviar un correo a celso.delgado@congreso.es 

Recibirá resposta.