Galicia aforrra en xuros 65 millóns de euros por ser comunidade de referencia no control do déficit e da débeda pública

Saliento que no Consello da Xunta  celebrado hoxe e presidido polo vicepresidente da Xunta en funcións, Alfonso Rueda foi aprobado o acordo de adhesión ao Fondo de Facilidade Financeira correspondente ao cuarto trimestre de 2016.

Na rolda de prensa Rueda salientou que só Galicia e Canarias se poden adherir a este fondo, “xa que son as únicas que cumpriron”, dixo, precisando que a comunidade galega pechou o pasado exercicio cun déficit do 0,68 %, por debaixo do límite do 0,7 % fixado polo Consello de Política Fiscal e Financeira.

Lembrou as numerosas vantaxes deste fondo que ofrece financiamento a custe 0, incidindo en que isto permitirá á comunidade aforrar en xuros 65 millóns de euros coa adhesión a este mecanismo neste 2016.

Alfonso Rueda afirmou que Galicia quere seguir sendo a comunidade de referencia no control do déficit e da débeda pública. “Seguimos pensando que este é o mellor camiño: non gastar o que non temos, non hipotecar o futuro de vindeiras xeracións e seguir co rigor nas contas públicas”, asegurou, facendo fincapé en que tamén é a autonomía que menos incrementou o seu volume de débeda desde 2008.

Sobre este punto, recordou que Galicia ten unha ratio de débeda seis puntos inferior á media; é a terceira que menos aumentou o seu déficit desde 2010, cumprindo cada ano os límites fixados polo Consello de Política Fiscal e Financeira, e mantense entre as autonomías que pagan con máis axilidade aos seus provedores, case un mes antes que a media.

“Imos seguir mantendo o modelo de crecemento baseado en controlar o déficit e a débeda; reforzando o gasto social, que agora chega ao 80% do orzamento; mantendo o gasto investidor, e somos a comunidade cun maior esforzo en 2015; e seguiremos pagando con axilidade aos provedores”, abundou.

Rueda concluíu asegurando que Galicia seguirá coa folla de ruta marcada polo Plan Estratéxico de Galicia ata 2020. “Xa crecemos a un ritmo do 3% e queremos acadar un crecemento medio do 2,5% ata 2020; fixemos a maior baixada de impostos da historia da Autonomía e seguiremos afondando nese camiño; e os principais indicadores macroeconómicos nos apoian, como as exportacións ou o índice de produción industrial”, dixo, facendo fincapé en que con este modelo, “queremos seguir consolidando a recuperación económica de Galicia”.

Si desexa facer algún comentario poder enviar un correo a celso.delgado@congreso.es

Recibirá resposta