Asistín na tarde de onte no Centro Cultural “Marcos
Valcárcel” da Deputación de Ourense ao
acto de presentación do libro “Cómo lo veo”, que recopila os artigos que ao
longo de catorce anos publicou no diario La Voz de Galicia, do recentemente falecido Antonio Tabarés Lezcano.
Comezou o acto, nun ateigado salón,coa intervención
do seu grande amigo Eduardo Olano, enxeñeiro de montes e expresidente da Deputación que lembrou a
figura de Antonio.
Logo foi o turno do
conselleiro de Educación, Cultura e Ordenación Universitaria, Xesús Vázquez e despois do presidente Manuel Baltar, que definiu a Tabarés como “Ourensabio”, dixo
que Antonio “formaba parte dese Ourense universal que tanto amaba e para o que
pedía grandes racións de autoestima e unha autopista infinita para fuxir do
vitimismo, sen dúbida o noso peor inimigo”.
Destacou
que Tabarés “sempre enriquecía calquera debate coa súa perspectiva de “gran
angular”, froito dunha traxectoria marcada pola súa humanidade, a súa capacidade
de traballo e algo que hoxe en día é un artigo de luxo: a visión”.
Baltar considerou “ que esta publicación é unha humilde
homenaxe para quen transmitía na súa columna bonhomía dabondo e opinións de
peso, necesarias para fixar criterio. Había nel o articulista, o tertuliano, o
emprendedor, o xestor, o amigo… tantos Antonio Tabarés como poidamos imaxinar”.
Pechou o acto a súa filla Fernanda Tabarés, directora de V
Televisión, que con enorme emoción agradeceu a todos os presentes a súa asistencia e a
publicación deste libro que recorda os pensamentos, inquedanzas e sentimentos do seu querido
pai, do que dixo ter "herdado a curiosidade", que lle resulta tan necesaria para
o seu traballo xornalístico.
Estas verbas
emocionaron a todos, e serviron para constatar o baleiro deixado por Antonio
despois do seu pasamento hai un ano e o sinceiro e profundo cariño que lle
profesaban xentes de diversas procedencias, idades, modos de pensar,profesións, etc.
Recibirá resposta
