 |
| Co carné da Eurocidade |
Acudín hoxe a Feces, Verín, ao acto de constitución da
Eurocidade Chaves-Verín en Axencia Europea de Cooperación Territorial (AECT).
Un acto presidido polo presidente da Xunta Alberto Núñez Feijóo que resaltou
que “permitirá aproveitar os instrumentos da UE para facer a colaboración entre
ambas as vilas “máis visible, máis ampla e máis útil para os cidadáns”.
Lembrou o carácter histórico do traballo en común entre Chaves e
Verín, que avanzou nos últimos anos cara á súa integración institucional e
agora dá “un novo paso nunha senda antiga, pero, sen dúbida, un paso de
xigantes”, afirmou.
Remarcou que a
creación da AECT Eurocidade Chaves-Verín supón crear “un marco xurídico
regulador da traxectoria de colaboración existente entre os dous municipios”,
posto que se trata dun instrumento nado do dereito comunitario, con
personalidade xurídica propia para contratar actuacións e servizos de interese
para os dous socios.
Entre as vantaxes que conleva a constitución da Eurocidade
en AECT, o presidente galego destacou, finalmente, que supón “abrir a porta ao
financiamento necesario para tirar o máximo rendemento do potencial das
relacións entre ambas as dúas cidades”.
Afondar
en tres eixes estratégicos
Na súa intervención, Alberto Núñez sinalou a necesidade de aproveitar a potencialidade da AECT para continuar o camiño iniciado co obxectivo de acadar unha xestión “coordinada, coherente e máis eficiente das zonas limítrofes”, polo que avogou por afondar en tres eixes estratéxicos. En primeiro lugar, referiuse a que se debe proseguir a construción “dese gran logro do espazo común Chaves-Verín que é a Eurocidadanía”.
Nesa liña, apostou por facer chegar a moitos máis veciños
e servizos as vantaxes da xestión conxunta e compartida de instalacións e
funcións municipais, evitando duplicidades e aforrando custos, e continuar na
liña de organización de eventos deportivos conxuntos, da bolsa de emprego
transfronteirizo ou das accións formativas.
Feijóo chamou a atención sobre a proposta na que se está a
traballar actualmente para asinar un convenio de cooperación sanitaria que faga
posible optimizar os hospitais públicos de Verín e Chaves, especializando cada
un deles en áreas concretas de intervención. Neste sentido, expresou o seu
convencemento “de que en maio faremos ese convenio, que será o inicio da
cooperación sanitaria entre dous países e dous hospitais que dan servizo a máis
de 100.000 habitantes”.
En segundo lugar, o presidente da Xunta defendeu a
capacidade da cooperación para dinamizar a economía, polo que considerou
preciso afondar na posta en valor de recursos endóxenos comúns, especialmente
as augas termais e mineiro medicinais. Neste punto, remarcou o proxecto
Termalagua, unha eurocidade termal e da auga, orientado a converter a
Eurocidade “nun referente do termalismo no sur de Europa”, formando
profesionais altamente cualificados e desenvolvendo investigacións neste eido,
dentro dun futuro Centro de Formación Termal e de Investigación da Auga.
E, en terceiro termo, referiuse o mandatario galego á
necesidade de continuar o traballo a prol do desenvolvemento dun territorio
común sustentable, proseguindo o proxecto iniciado en torno ao corredor
ecolóxico e fluvial do río Támega, procurando a mellora da calidade da auga e a
creación dun cinto verde de espazos de ocio.
A xuízo do presidente da Xunta resulta indubidable
que desde a súa conformación en 2007, a Eurocidade Chaves-Verín, como tamén a
de Tui-Valença, se revelou como “unha ferramenta de enorme utilidade”, non só
para optimizar e aumentar as vías de cooperación existentes, senón tamén para
facerlle fronte con maior eficacia aos novos desafíos que puxo ante nós a situación de escaseza derivada da crise económica.
http://www.crtvg.es/informativos/a-ue-dalle-personalidade-xuridica-795713
Si desexa facer algún comentario poder enviar un correo a celso.delgado@congreso.es
Recibirá resposta.
Si desexa facer algún comentario poder enviar un correo a celso.delgado@congreso.es
Recibirá resposta.
