Así lamentamos que desde o Goberno catalán recórrase novamente á cantilnela de que "hai que apostar por investimentos con retorno", insinuando que o AVE a Galicia non é unha delas, e acusamos a Homs de utilizar datos equivocados e de omitir outros que non lle conveñen para intentar sementar dúbidas sobre o proxecto do AVE a Galicia, tan necesario para a vertebración do país e para o desenvolvemento económico e social do noroeste peninsular.
Neste sentido, subliño que Homs omitiu conscientemente cuestións como que o proxecto de lei de Orzamentos Xerais do Estado para 2012 contempla para o Corredor do Mediterráneo un orzamento de investimento de 1.432,26 M€ e para o Corredor Noroeste unha consignación de 1.217,39 M€.
Recordamos que o 20 de febreiro de 2008 entrou en servizo o tramo Roda de Bará-Barcelona, facendo posible viaxar entre Madrid e Barcelona (659 km) nun tempo de 2 horas e 30 minutos e insistimos en que se o Sr. Homs quixese hoxe tomar o tren desde Barcelona a Madrid podería escoller entre 28 frecuencias, e todas menos unha serían en trens AVE, mentres que se calquera galego quere viaxar en tren a Madrid só poderá escoller entre un tren diúrno (6,53 horas tardaría desde A Coruña e 8,18 horas desde Pontevedra) e dous nocturnos (entre 10 e 11 horas de duración de viaxe).
Homs debe saber que os Corredores ferroviarios Atlántico e Mediterráneo, así como o Central, son compatibles e complementarios e afirmamos que afortunadamente o Goberno da Sra. Pastor está comprometido con que todos os cidadáns que vivimos en España temos os mesmos dereitos en materia de comunicacións e infraestruturas, con independencia de onde vivamos.
Terminamos a nosa nota con esta sentenza: "Sr. Homs, os seus argumentos insolidarios non teñen retorno, os investimentos do AVE a Galicia si, defenda o seu pero sen meterse co que en xustiza merecen os demais".
