Tamén hoxe pola tarde na Comisión de Medio Ambiente, Medio Rural e Mariño interpelei ao Secretario de Estado de Medio Ambiente e Auga, Josep Puxeu, e pedinlle que se comprometa a manter os investimentos para que a Confederación Hidrográfica do Douro leve a cabo de forma urxente as obras necesarias para evitar os constantes desbordamentos dos ríos que afectan ao territorio ourensán desa Confederación e que están causando danos ás propiedades dos Concellos e veciños da zona.
En concreto recordei que a C.H. do Douro controla en Ourense os ríos Támega, Búbal e outras canles menores que afectan aos termos municipais de Laza, Verín, Oimbra, Castrelo do Val, A Mezquita, Monterrei, Cualedro, Vilardevós e A Gudiña
Levo anos realizando unha tarefa de control dos investimentos da CH do Douro relativas á defensa contra inundacións e avenidas, así como das de adecuación ambiental de canles e marxes e volvin a preguntar hoxe sobre este tema porque fai poucas datas, en concreto no mes de decembro e a consecuencia da neve e choivas caídas, volveron producirse desbordamentos dos ríos Limia, Búbal e Támega, causando danos en vivendas, locais comerciais e propiedades municipais. Puxen dous exemplos:
MONTERREI
Critiquei as ineficaces actuacións realizadas pola CHD relativas á restauración hidrológica e ambiental dos Ríos Bubal e Rubín na localidade de Vilaza, Monterrei: Dixen que o proxecto foi redactado por técnicos da Confederación, sen ter en ningún momento en consideración as observacións formuladas desde o Concello de Monterrei.
A citada obra intentaba resolver o problema das riadas do núcleo de Vilaza pero o que conseguiu foi o efecto contrario ao executarse un muro ao longo da canle do Río Búbal que lonxe de impedir as crecidas deste, o que impide o retorno das augas á súa canle, alargando o tempo das inundacións.
Derrubouse un alicerce de pedra da ponte coa intención de eliminar un obstáculo pero ao final da obra volveuse a realizar o mesmo alicerce, aínda que agora de formigón.
É dicir, unhas obras contratadas por un valor de 377.637 € que resultaron ineficaces. Neste sentido, trasladei ao Secretario de Estado as inquietudes do Concello de Monterrei para corrixir esa situación, que son:
1. A retirada dos materiais que se acumulan na canle (fundamentalmente areas que se van acumulando e que reducen a capacidade da canle) e
2. A continuación do colector de drenaxe ata un punto de evacuación máis favorable, xa que o actual punto de evacuación fai que as augas do río suban aflorando polos sumidoiros.
OIMBRA
Tamén pedin explicacións sobre a situación do Río Támega ao seu paso polo concello de Oimbra, onde se produciron inundacións en decembro do pasado ano especialmente nos pobos de San Cibrao e Rabal. Dixen que a canle atópase moi obstruido pola area e as marxes cheas de maleza e árbores caídas que esixen labores de limpeza.
Lamentei que se produzan situacións como esta cando o Goberno puido paliar os efectos destas avenidas se realizase as obras necesarias ao seu debido tempo e executado os orzamentos. Así lle recordoei ao Sr. Puxeu como que o executivo socialista en recentes respostas parlamentarias recoñecera que en 2008 deixou sen gastar case dous millóns de euros dos 2.700.000 consignados pola Confederación Hidrográfica do Douro para a provincia de Ourense.
Pedinlle finalmente un maior compromiso e investimentos eficaces.
(Dende o minuto 46:00 ao 59:40)
