En agosto medra o paro rexistrado un 1,70% en Galicia quedando en 109.691 o número de desempregados, o menor da historia nese mes

 

O Servizo Público de Emprego Estatal (SEPE) difundiu hoxe os datos oficiais de paro rexistrado correspondentes ao mes de agosto de 2025.

Galicia

O mercado laboral galego acaba agosto con 109.691 persoas, medrando o paro rexistrado en relación co mes anterior en 1.833 persoas, un 1,70 %. É o nivel de desemprego máis baixo nun mes de agosto de toda a serie histórica

Na comparativa interanual, o paro baixou en 8.987 persoas (-7,57 %). Na evolución anual o paro cae nas catro provincias, nas sete grandes cidades e en todos os sectores económicos, liderando a caída a construción (-12,47 %), seguido do sector primario (-11,30 %), da industria (-9,43 %) e, por último, do sector servizos (-6,60 %).

En relación cos colectivos prioritarios, tanto no caso das mulleres como dos menores de 30 anos e dos parados de longa duración, rexístrase a cifra máis baixa de desemprego para un mes de agosto de toda a serie histórica (maio 2005), rexistrando respectivamente unha caída anual de 4.876 persoas —o 6,93 %—, de 827 persoas —o 6,60 %— e  de 5.619 persoas —o 9,22%—. 

Ourense 

Medra o paro rexistrado en agosto na provincia de Ourense en relación co mes anterior en 255 persoas, un  1,95 %.

O número de parados queda en 13.345 deles 5.412 son homes e 7.933 mulleres, 12.759 son maiores de 25 anos e 586 menores.

Por sectores, 586 son da agricultura, 1.348 da industria, 790 da construción, 9.177 dos servizos e 1.444 do colectivo sen emprego anterior.