Rueda salientou o papel central que xoga a cooperación entre ambos territorios na construción dun futuro común no marco da Eurorrexión Galicia-Norte de Portugal. Asegurou que se trata dunha relación consolidada, baseada na confianza mutua e na vontade compartida de avanzar en proxectos estratéxicos que melloren a vida das persoas. Nesta liña salientou que “Porto tamén é un símbolo de carácter, identidade, modernidade e orgullo para os galegos”.
O presidente galego defendeu con especial énfase a necesidade de avanzar con decisión na conexión de alta velocidade entre Vigo e Porto, unha infraestrutura que considerou “a prioridade máis evidente” e enfatizou na necesidade “dun tren rápido, moderno e eficiente”. Ademais, subliñou que esta liña debe converterse na columna vertebral da Eurorrexión, favorecendo a mobilidade, a competitividade e a integración real entre ambos territorios.
Rueda trasladou o seu recoñecemento ao compromiso que está a mostrar Portugal con esta infraestrutura e sinalou que a Xunta continuará reclamando ao Goberno español avances concretos e un “futuro con conexións reais e infraestructuras necesarias” tanto na Saída Sur de Vigo como no tramo ata a fronteira e no novo viaduto sobre o Miño. O obxectivo, indicou, é que conexión estea operativa a máis tardar en 2030, e que se desenvolva en coordinación cos aliados portugueses e coa implicación do tecido económico e social de ambos lados da fronteira.
O titular do Goberno galego tamén defendeu a inclusión da conexión Vigo-Porto na Rede Básica Europea de Transportes, co fin de garantir o acceso aos fondos comunitarios e a integración plena no modelo europeo de mobilidade sostible. Neste senso, Galicia e Portugal acudirán con reivindicacións parellas ao Foro do Corredor Atlántico que se celebra esta semana en Bruxelas para presentar esta demanda compartida.
O presidente galego referiuse ademais a outros eidos de cooperación transfornteiriza, como as novas conexión viarias previstas entre “A Gudiña e Vinhais ou entre Monçao e Salvaterra”, así como á necesidade de dotar aos “máis de 14.000 traballadores transfronteirizos” dun marco legal específico que recoñeza e facilite a súa mobilidade diaria.
No ámbito cultural, a Xunta reafirmou o seu apoio á candidatura do Camiño Portugués a Santiago como Patrimonio Inmaterial da Humanidade, ao tempo que traballa con Portugal para garantir o éxito do Xacobeo 2027 como evento internacional.
Finalmente, o xefe do Executivo autonómico agradeceu a distinción recibida, que considerou non como un recoñecemento persoal, senón como “unha expresión de confianza, de recoñecemento mutuo e da posta compartida de tantas cousas que unen a Galicia e o Norte de Portugal” e “unha honra para todo o pobo galego que hoxe sentímonos recoñecidos e acollidos nunha cidade á que nos unen tantas cousas”. Sinalou que a cooperación entre Galicia e Portugal é un exemplo de política útil, con raíces profundas e metas ambiciosas, e puxo en valor o espírito atlántico, aberto e colaborativo que caracteriza a ambos pobos.
