Prado salientou que os populares se comprometeron a que a transición na Presidencia do partido fora tranquila, exemplar e con unidade; a que os galegos seguiran tendo un Goberno centrado nas súas prioridades; a seguir achegando a estabilidade e o rigor que se votou nas urnas; e a seguir traballando por Galicia cunha política útil, afastada dos sobresaltos e o bochorno que forman parte do manual sanchista. “E cumprimos”, dixo.
A continuación, a secretaria xeral pasou a resumir o 2022 do PPdeG en 12 momentos:
1. Xaneiro. XXV INTERPARLAMENTARIA POPULAR
“Xaneiro fainos ver onde estabamos e cara a
onde fomos. No primeiro mes do ano, aínda con máscaras e con Alberto Núñez
Feijóo de líder, celebramos a vixésimo quinta Interparlamentaria Popular. Alí
referendamos que somos o partido da maioría: con 42 deputados no Parlamento de
Galicia; 10 no Congreso dos Deputados; 13 senadores; e 1 representante no
Parlamento Europeo; ademais dos 152 concellos que gobernamos”.
.jpg)
2. Febreiro. AS COMISIÓNS DO PPdeG
“Poño como exemplo a Comisión de Medio Rural
de todas as comisións que se celebraron ao longo do ano: máis dunha vintena de
laboratorios de ideas que nos facilitan estar ao carón das inquedanzas de todos
os sectores”.
3. Marzo. FEIJÓO ANUNCIA A SÚA CANDIDATURA PARA PRESIDIR O PP
“O terceiro mes foi de cambios para nós.
Despois de 16 anos sendo o noso faro, tivemos que asumir que Alberto Núñez
Feijóo ía seguir sendo o noso faro, pero agora desde Madrid. Agora, o paso do
tempo deulle a razón á súa decisión. Feijóo está preparado para ser o próximo
presidente do Goberno, o presidente que España necesita, e desde a súa terra
imos apoialo sen cesar”.
4. Abril. RUEDA, CANDIDATO ÚNICO Á PRESIDENCIA DO PPdeG
“Afortunadamente, Feijóo tiña relevo, e en
abril confirmamos que era o mellor relevo posible: Alfonso Rueda, a voz da
experiencia tanto na Xunta como no Partido Popular. Así foi, que recibiu máis
de 7.800 avais de apoio”.
5. Maio. NOMEAMENTO DE ALFONSO RUEDA COMO PRESIDENTE DO PPdeG
“Esa transición exemplar culminou en maio en
Pontevedra, baixo o lema Galicia, o camiño a seguir, nun Congreso
Autonómico que deixou claro que a nosa Comunidade e o PPdeG teñen presidente
para rato. Un presidente que tomou posesión no Hórreo arroupado por un Grupo
Parlamento sólido e solvente”.
6. Xuño. PRIMEIRA XUNTA DIRECTIVA CON RUEDA Á FRONTE
“O ecuador do ano tróuxonos o primeiro Comité de Dirección e a primeira Xunta Directiva da nova etapa, e de aí, quedo cunha frase que dixo o presidente Rueda: ‘Volvemos demostrar que somos un exemplo de unidade, capaz de superar probas tan complicadas como foi é unha sucesión en tan pouco tempo’. E, como el mesmo dixo onte, ‘a estabilidade segue vixente’”.
7. Xullo. DÍA DO AFILIADO DE NOVAS XERACIÓNS
“En xullo, coa romaría do Pino puidemos, por
fin, celebrar o primeiro grande acto multitudinario en moito tempo; en Cenlle
reunimos ás Novas Xeracións para referendar que o futuro de Galicia pasa pola
nosa mocidade; e en Mondoñedo, conmemoramos o Día de Galicia para reivindicar o
galeguismo integrador do noso partido”.
8. Agosto. INICIO DO CURSO POLÍTICO EN CERDEDO-COTOBADE
“Recuperamos ao grande outra das nosas citas:
o inicio do curso político, en Cerdedo-Cotobade. E aí, o presidente Rueda e o
presidente Feijóo demostraron o poder do Partido Popular. Acompañáronnos os
presidentes Juanma Moreno, Isabel Díaz Ayuso, Alfonso Fernández Mañueco e
Fernando López Miras, a máxima expresión de que somos maioría en toda España”.
9. Setembro. ALMORZO DE TRABALLO CON DEPUTADOS E SENADORES
“Acompañada dos nosos deputados nacionais e
dos senadores, dixémoslle ao Goberno central que Galicia precisa moito máis
compromisos e menos visitas, algo que seguiremos reiterando en 2023”.
10. Outubro. PRESENTACIÓN DOS CANDIDATOS DAS CIDADES DO 28-M
“De cara ás eleccións municipais, os primeiros
candidatos que presentamos foron os das sete cidades. Como dixen esta semana,
somos unha opción á alza e saímos a gañar nas urbes galegas”.
11. Novembro. ACTO DA INFANCIA E ACTO ‘SOMOS IGUALDADE’
“Ademais de lembrar a figura de Manuel Fraga
no centenario no seu nacemento e celebramos o Día da Infancia, foi o mes da
igualdade, para ben e para mal: o 25 de novembro conmemoramos o Día da
Violencia de Xénero co acto Somos Igualdade, que lamentablemente quedou
emborronado pola deriva da Lei do só si é si. Seguiremos traballando
pola igualdade real e non a que pretende o Goberno de Sánchez”.
12. Decembro. FORO DE ALCALDESAS DO PPdeG
“Chegamos a este último mes do ano en plena
forma, e actos como o Foro de Alcaldesas deixárono claro. En Mos reunimos a 24
rexedoras que representan o mellor do PPdeG: seriedade e solvencia en todo tipo
de concellos”.
“Rematamos un 2022 inmellorable, no que demostramos que somos capaces de afrontar os cambios e saír deles aínda con máis forza, a mesma coa que afrontamos o vindeiro ano”, engadiu a secretaria xeral, que augurou un 2023 “tamén inmellorable”.
Con respecto aos dous fitos que xa están definidos, as eleccións municipais e as xerais, Prado apuntou que nos comicios locais os populares demostrarán que son maioría e tinguirán Galicia de azul: “Quedan menos de 5 meses e os nosos equipos, nos 313 concellos, están en plena forma”; “e as eleccións xerais, cando a Pedro Sánchez lle veña ben convocalas, serán un punto e aparte na política española. Alberto Núñez Feijóo liderará o cambio que precisa España”, agregou.
“Mentres, en Galicia, o presidente Alfonso Rueda, o Goberno galego e o Partido Popular seguirán dando tranquilidade e apuntalando o compromiso que temos cos galegos e galegas”, concluíu, desexando un feliz 2023 a todos.
