Nel avanzou hoxe un investimento de 5,5
millóns de euros para as obras e equipamento do novo servizo de Medicina Nuclear do Complexo Hospitalario Universitario
de Ourense.
Durante a rolda de prensa do Consello,
Feijóo precisou que este servizo trasladarase á planta -1 do CHUO, o que
permitirá mellorar as instalacións -con catro áreas diferenciadas- e incorporar
alta tecnoloxía como: a renovación das dúas novas gammacámaras existentes ou
instalar un equipo PET-TC.
O presidente da Xunta recordou que
despois do novo edificio posto en marcha en 2017, cun investimento de 41
millóns de euros, a Xunta está inmersa nunha reforma integral do centro, co fin
de iniciar este mes de marzo a construción dun novo edificio hospitalario e
reformar o materno infantil -52,6M€-. Así mesmo, xa está licitado o proxecto
para renovar e triplicar o espazo actual da Unidade de Coidados Intensivos,
para o que se destinarán 9,4 millóns de euros; e o pasado verán rematouse o
Plan funcional para construír un edificio administrativo e un novo edificio
ambulatorio no complexo hospitalario.
Máis de 340.000 metros cadrados de nova superficie industrial
En materia económica, Feijóo destacou a avaliación do Plan Estratéxico 2022-2024 do
Parque Tecnolóxico de Galicia (Tecnópole), que ten como obxectivos atraer
novos proxectos empresariais, mellorar os servizos e infraestruturas, poñer
espazos ao servizo dos autónomos e aproveitar as oportunidades dos fondos Next
Generation e a chegada do AVE.
Para contribuír a este crecemento e consolidación de solo empresarial no concello de San Cibrao das Viñas, anunciou que a Consellería de Medio Ambiente habilitará máis de 340.000 metros cadrados de nova superficie industrial, cun investimento de 10 millóns de euros. “Isto farémolo a través da modificación do PXOM”,precisou, subliñando que, unha vez feito isto, a previsión é licitar as obras de urbanización este mesmo ano.
Polígonos agroforestais de iniciativa pública de Galicia
No eido rural, o responsable do Goberno
autonómico salientou a declaración dos
dous primeiros polígonos agroforestais de iniciativa pública de Galicia,
que estarán situados nos concellos de Oímbra e Cualedro, como iniciativas de
utilidade pública e de interese social. “O obxectivo é recuperar a actividade
agrícola ou forestal en áreas de terra agroforestal que, co paso do tempo,
quedaron abandonadas ou están infrautilizadas”, dixo, explicando que a
declaración de utilidade pública e de interese social permitirá a tramitación
urxente dos procedementos para poñer en marcha estes dous polígonos.
O polígono
de Oímbra, que contará cunha superficie de 22 hectáreas repartidas en 70
parcelas de 73 propietarios, terá como actividade principal en toda a súa
extensión os cultivos agrícolas de ciclo curto e, na parte sur, a gandería
extensiva; e como actividade secundaria, as árbores froiteiras e, na parte sur,
a gandería extensiva.
O polígono de Cualedro, contará
cunha superficie de 64 hectáreas, repartidas nunhas 70 parcelas de 70
propietarios. Como actividade principal establecerase a gandaría de extensivo e
cultivos complementarios, contemplando a produción para carne de gando vacún,
porcino, ovino e cabrún e dando prioridade ás explotacións que inclúan unha
produción integrada en ecolóxico-; e como actividade secundaria, outros
cultivos agrícolas e árbores froiteiras, mantendo sempre a vexetación de
ribeira existente.
Revitalización da fortaleza de Monterrei e ampliación
do estadio do Couto
No eido cultural, Feijóo resaltou un
investimento de 17 millóns de euros para o proxecto
de valorización da fortaleza de Monterrei, unha iniciativa que implicará
catro anos para restaurar a estrutura, mellorar as calidades paisaxísticas e
aplicar criterios de sustentabilidade e eficiencia enerxética. “O obxectivo é
converter a fortaleza nun recurso turístico de primeira orde para a provincia”,
abundou.
En relación ao deporte, o titular da
Xunta referiuse ao proxecto de
ampliación, reforma e mellora do estadio do Couto, cunha licitación por
preto de 2 millóns de euros. Unha vez adxudicadas, en torno ao mes de xuño,
comezaranse as obras, cun prazo de execución de sete meses.
Mobilidade sostible
No fomento da mobilidade sostible,
destacou a posta en marcha da construción
dun itinerario peonil e ciclista que conecte a cidade de norte a sur, cun
investimento de 4,5 millóns de euros; así como a execución de dúas sendas peonís na estrada OU-101
ao seu paso polos concellos de San Cibrao das Viñas, O Pereiro de Aguiar e
Paderne de Allariz, nas que se investirán máis dun millón de euros.
Concurso de ideas para a sede administrativa da Xunta
Por último, o presidente do Goberno
galego anunciou a convocatoria dun concurso
de ideas para o deseño da nova sede administrativa da Xunta en Ourense, á
que se trasladarán máis de 940 traballadores.
Esta nova sede enmárcase na estratexia
de alugueiros cero que está a levar a cabo a Administración autonómica desde
2009, co obxectivo de concentrar servizos administrativos nos mesmos espazos e
aforrar costes no aluguer.
