A Xunta licita por máis de 780.000 euros as obras de humanización da Avenida do Bierzo no Concello do Barco de Valdeorras

 

Coñecemos que a Consellería de Infraestruturas e Mobilidade licitou a execución das obras de renovación da avenida do Bierzo, no núcleo urbano do Barco de Valdeorras, unha actuación coa que se busca mellorar a accesibilidade e humanizar esa contorna.

A Plataforma de Contratos Públicos de Galicia publica o inicio da contratación desta actuación por un importe de máis de 780.000 euros. As empresas interesadas teñen de prazo ata o vindeiro 6 de abril para presentar as súas ofertas.

Esta actuación ten un prazo de execución de 8 meses e suporá un investimento total da Xunta de preto de 815.000 euros, tendo en conta a reposición dos servizos afectados. A previsión é poder empezar a acometer os traballos no verán.

Actuarase nos primeiros 655 metros da estrada autonómica OU-622, o treito da vía cun carácter máis urbano, para reforzar a seguridade e facer máis humana e accesible a súa contorna.

Para conseguir este obxectivo, mellorarase a accesibilidade nas pontes situadas no inicio da estrada autonómica: do punto quilométrico 0+000 ao 0+200, para salvar a vía ferroviaria; e do quilómetro 0+275 ao 0+290, para salvar o río Cigüeño.

Ademais, incrementarase o ancho da beirarrúa na marxe esquerda, na medida en que sexa posible, coa fin de mellorar a mobilidade para o tránsito peonil dos veciños, así como a accesibilidade aos edificios localizados na zona, que na actualidade dispoñen de accesos con importantes desniveis. Tamén a partir do punto quilométrico 0+320 e ata o 0+655 ampliarase o ancho das dúas beirarrúas.

Ademais, reordenaranse os usos da avenida do Bierzo no seu treito central, en canto ao tráfico peonil, de vehículos e zonas de estacionamento.

Este proxecto do departamento que dirixe Ethel Vázquez persegue a mellora das condicións de seguridade viaria no contorno do colexio Divina Pastora, así como nas rutas de chegada dos cativos ao colexio, distanciando o tráfico rodado da zona de tránsito.

Destaca na actuación a renovación das infraestruturas de abastecemento e saneamento que discorren por ambas as marxes e que presentan un grado de deterioro importante debido ao paso do tempo.

Neste sentido, e tendo en conta que se levarán a cabo melloras de servizos que son de competencia municipal, como o saneamento, o abastecemento, a iluminación e a semaforización, a Xunta solicitou a implicación do Concello, que se comprometeu a asumir a titularidade do treito, unha vez finalizados os traballos.

Celebro este investimento da Xunta de Galicia en Valdeorras, que contrasta co desprezo que o amosa o Goberno de España en relación coa autovía estatal A-76, Ourense e Ponferrada, que acumula anos de retraso, e coas melloras e mantemento da estrada N-120.


Con la tecnología de Blogger.