Informa hoxe a Consellería de Infraestruturas que un total de 16 empresas
presentaron as súas ofertas para a execución das obras da estación de autobuses
intermodal de Ourense, unha infraestrutura na que o Goberno galego prevé
investir máis de 4 millóns de euros e que foi licitada o pasado 26 de febreiro.
O Goberno galego prevé iniciar o vindeiro verán a construción da nova
terminal de autobuses integrada na estación de ferrocarril. Contará con 13
dársenas de operación e 3 dársenas de regulación, ademais de cun edificio de
máis de 700 m² construídos, para albergar os diferentes servizos: venda de
billetes, consigna, oficinas, aseos.
Avánzase así nos trámites para facer realidade unha infraestrutura clave
para a cidade, a estación intermodal, actuación na que están a traballar
conxuntamente a Xunta, o Concello e o Ministerio de Fomento, a través de Adif,
para lograr un encaixe perfecto das pezas que a conforman: a nova terminal de
autobuses, integrada na terminal ferroviaria; a adaptación da estación de tren;
o aparcadoiro subterráneo; e os elementos de conexión entre os barrios.
A nova estación de autobuses forma parte da primeira fase dese gran
proxecto, xunto co aparcadoiro subterráneo, sumando un investimento de máis de
11 millóns de euros.
Adif executará as obras correspondentes ao aparcadoiro, con dúas plantas
con 300 prazas, que darán servizo ás terminais de autobuses e de ferrocarril e
permitirá unha reodernación da actual praza da estación, cun investimento de
arredor de 7 M€, achegando a Xunta 3,9 M€ e Adif o restante.
Nunha 2ª fase, que desenvolverá o Ministerio de Fomento, levarase a cabo
a adaptación da terminal de ferrocarril e as actuacións para mellorar a
integración urbana e a conexión transversal cos barrios da Ponte e do Vinteún.
Si desexa facer algún comentario poder enviar un correo a celso.delgado@congreso.es
Recibirá resposta.
