Feijóo: " Agora é máis urxente que o país despexe o seu futuro"


Onte pola tarde asisto en Santiago de Compostela á primeira Xunta Directiva do partido tralo XVI Congreso autonómico.

Nela o presidente do PPdeG, Alberto Núñez Feijóo, sinalou que non quere para Galicia a irresponsabilidade que houbo en España estes últimos meses senón que que quere que volva ao país a responsabilidade que si hai na nosa comunidade.

Segundo indicou, o fracaso que partidos como o PSOE, Ciudadanos, Podemos e os nacionalistas arrastraron a todo o país, ata ter que celebrar uns novos comicios xerais, tamén ten que ser só deles o día das eleccións. 

Así mesmo, apuntou que se os populares fixeran como o resto, hoxe en Galicia estariamos vendo que partidas recortar. Sen embargo, agora o que se fai é elixir en que investimos para solucionar os problemas sociais derivados da crise e para garantir o futuro, xa que aquí houbo a responsabilidade que faltou este tempo en España.

Tamén asumiu que agora non será sinxelo vencer ao hastío merecido contra a política posto que, se en decembro viñamos de catro anos de responsabilidade que levaron ao conxunto do Estado a volver crecer, en xuño vimos de cinco meses de irresponsabilidade que levaron ao bloqueo, Por este motivo salientou que agora é máis urxente que entón que o país despexe o seu futuro.

Ademais, Feijóo apuntou que co PP non hai que escoller entre Galicia e España porque elíxense as dúas, cun candidato galego, Mariano Rajoy, que vai coidar dos intereses da nosa comunidade porque “é un de nós”.

O líder do PPdeG tamén incidiu en que teñen que ser os populares os que se acheguen á xente sendo, ademais, o único partido que demostrou que cumpriu co seu deber.

PROXECTO PARA GALICIA

Feijóo afirmou que os populares teñen un nivel de esixencia maior porque en eles tamén hai un caudal de confianza e esperanza máis grande, así como teñen o listón máis alto por ter a obriga de construír, servir e concretar, sen ser simples comentaristas de tertulias ou de twitter.
No acto, Feijóo agradeceu aos afiliados darlle plena liberdade para propoñer o seu equipo e despois ratificalo nas urnas, asegurando que hai que merecer formar parte do maior órgano do primeiro partido de Galicia, xa que non só é unha honra senón tamén son deberes. Deste xeito, admitiu que hai que exercer cada día por Galicia e por España, sendo dignos representantes dos afiliados, dando o máximo deles mesmos e cumprindo co seu deber.

Nese senso, lembrou que veñen do proceso de Congresos de maior renovación no partido nos últimos anos e falou da capacidade de estar en disposición de só ter que estar pendentes de servir a Galicia sen depender de ninguén. Así, a diferenza entre os populares e o resto de formacións é que eles teñen algo que os une, que é un proxecto para Galicia, mentres os demais autodestrúense.

Así mesmo, incidiu en que no seu Congreso eles falaban do seu compromiso, que é a nosa comunidade, pero nos procesos dos demais adversarios só saben falar de Feijóo.

O presidente tamén puxo en valor a liberdade que permite ao PP servir a Galicia, algo para o que se precisa ter as dúas mans libres e non como lles ocorre ao resto, que teñen as mans atadas ao favor da UPG, Sánchez, Rivera, Iglesias ou das outras forzas das que dependan para pactar.


Pola contra, admitiu que el é libre como candidato “sen máis debe que Galicia”, e é libre como presidente “sen máis debe que os galegos”.

https://www.youtube.com/watch?v=a17edmsNKw4&noredirect=1

Si desexa facer algún comentario poder enviar un correo celso.delgado@congreso.es 
Recibirá resposta
Con la tecnología de Blogger.