Hoxe na edición local de
"La Voz de Galicia" o periodista Rubén Nóvoa publica
un traballo xornalístico relacionado coa noticia de onte de que o tramo entre Taboadela e Seixalbo necesita
dun informe de impacto ambiental máis detallado, e que volve poñer sobre a mesa
dous debates recorrentes dende que está anunciada a chegada desta infraestrutura
á capital ourensana.
Refírese en primeiro lugar
á cuestión que ten que ver co impacto desta nova tramitación ambiental sobre o
prazo de 2018, xa que este trámite pode prolongarse entre seis meses e un ano,
segundo os expertos consultados por este xornal.
Ao respecto recolle as
palabras do alcalde de Ourense,
Agustín Fernández,
que considera que o prazo de 2018 non se vai cumprir.
A este respecto recolle a miña valoración, que foi a de manter a
"calma" sobre os prazos da AVE malia a nova tramitación necesaria. «ADIF o que
manifestou é que é posible emendarse en tempo e iso é o que esperamos».
Tamén alude en segundo
lugar á cuestión da estación de alta velocidade de Ourense. Recolle manifestacións do
alcalde que di que manterá a súa presión sobre o goberno central para que se
desenvolva o proxecto de Norman
Foster, xa que considera que se converterá nun fito arquitectónico
para a cidade.
E tamén recolle o diario
"La Voz de Galicia" as miñas declaracións ao respecto no sentido de
que o esforzo investidor debe centrarse en concluír a liña que conecta a Ourense con Madrid:
«O máis importante é a vía coa Meseta. Os esforzos presupostarios hai que
dirixilos nese sentido. Ese é o esforzo que debemos que facer e é o razoable».
Nese sentido, precisei que Ourense
xa está a recibir os beneficios dunha mellor conexión ferroviaria con Madrid:
«Neste primeiro semestre a alta velocidade vai chegar a Zamora e iso significa unha viaxe de 30
minutos menos. Estaremos, polo tanto, en Madrid nun tempo inferior que se imos
en coche. Iso parecía un sono e xa vai ser unha realidade».
Sobre a estación e as
demandas do Concello de
Ourense, a reportaxe xornalística cita as miñas declaracións: «É
un tema que debemos abordar, pero hai tempo abondo. Ten que ser unha estación
economicamente viable e adaptada ás necesidades de Ourense cun criterio de intermodalidade
e de consenso entre as distintas administracións implicadas».
