Sobre a compra de débeda soberana polo Banco Central Europeo

A noticia económica máis destacada nos medios de comunicación de hoxe, corresponde ás declaracións efectuadas onte por Mario Draghi, presidente do Banco Central Europeo (BCE), que aseverou que comprará débeda soberana dos países da eurozona, aínda que baixo estritas condicións e a condición de que os gobernos activen os mecanismos de estabilidade da eurozona co fin de garantir a irreversibilidade do euro e a correcta transmisión da política monetaria a todos os países da eurozona.

Ademais engadiu que deberá ser solicitada e que este programa de compra de débeda non ten un volume máximo e se levará a cabo ata que se logre o obxectivo de reducir as primas de risco. 

A importante decisión do Banco Central Europeo supón dar unha mensaxe clara e nítida aos mercados de que se fará todo o posible por evitar ataques que poñan en perigo o euro. E que os países con problemas de financiamento que cumpren co déficit e afrontan as reformas necesarias para reducilo contarán co apoio ilimitado do Banco Central Europeo.

A realidade é que, esde que se iniciou este ano 2012 España tiña dous camiños:

Controlar as súas contas, facer reformas continuas en todos os ámbitos e recuperar a confianza da Unión Europea;ou seguir co déficit descontrolado, seguir coas políticas que nos levaron a esta mala situación e seguir minando a nosa confianza.

Pois ben, o novo goberno de España ten apostado de forma decidida polo primeiro camiño, é dicir, polas políticas que por certo ven aplicando a Xunta de Galicia dende hai xa máis de tres anos e medio porque son a mellor maneira de garantir a solvencia e o futuro do noso país.      

Polo tanto a decisión do Banco Central Europeo demostra que ese é o camiño correcto.  Que, o control do déficit é fundamental e, así como Galicia cumpre co déficit e non precisa axuda que outras comunidade si necesitan, España, se segue coa senda emprendida de reformas, tampouco terá problemas de financiamento. E iso será así porque, se fora necesario, contará co apoio inequívoco e ilimitado do BCE, eliminando calquera dúbida sobre a nosa capacidade de obter financiamento e solvencia.

Dicir tamén que hoxe Soraya Saénz de Santamaría e en relación ao anuncio de onte do Banco Central Europeo e a solicitude dun posible rescate, pediu calma e a máxima prudencia: "Son decisións que teñen implicacións importantes para o noso país e para o noso futuro; e este Goberno analizarao con rigor, con detalle e sopesando todos e cada un dos elementos".

Ademais a Vicepresidenta cualificou como positivas as palabras de Draghi, aínda que dixo que se debe esperar ás próximas semanas, cando se celebrarán novas reunións do Ecofin e do Eurogrupo para tomar algunha decisión.

Agardaremos.