O INE difundíu hoxe a Enquisa de poboación activa (EPA)
correspondente ao I trimestre de 2024. O IGE procesou a información en clave galega, con
estos resultados.
Poboación activa
No primeiro trimestre de 2024 a poboación galega de 16 ou máis anos
situouse en 2.368.000 persoas, das cales 1.259.300 clasifícanse como activas, o
que sitúa a taxa de actividade no 53,2%. Con respecto ao trimestre anterior, o
número de activos e de activas aumenta en 8.500 persoas e a taxa de actividade
aumenta 0,3 puntos respecto ao cuarto trimestre de 2023.
Con respecto ao mesmo trimestre de 2023, o número de persoas
activas aumenta en 21.000 persoas e a taxa de actividade aumenta 0,6 puntos
porcentuais.
or sexo, a taxa de actividade masculina aumenta 0,4 puntos
respecto á cifra rexistrada hai 3 meses, situándose no 57,5%. A taxa de
actividade feminina, pola súa banda, rexistra unha variación positiva cifrada
en 0,2 puntos, ata situarse no 49,3%.
Poboación ocupada
A ocupación diminúe en 8.200 persoas no primeiro trimestre de
2024 respecto á cifra do trimestre anterior e sitúase en 1.127.700 persoas
ocupadas. A taxa de ocupación tamén diminúe con respecto ao trimestre pasado e
sitúase no 47,6%.
Nos últimos doce meses o número de ocupados e de ocupadas
aumentou en 24.400 persoas, o que supón un incremento do 2,2% en termos
relativos.
Por sexo, neste trimestre diminuíu tanto a
ocupación masculina como a feminina: o número de ocupados varóns diminúe en
6.000 persoas respecto ao cuarto trimestre do ano 2023; a ocupación das
mulleres, pola súa banda, rexistrou unha diminución de 2.200 persoas. En termos
de taxas, isto tradúcese nunha diminución da taxa de ocupación masculina de 0,6
puntos e dunha diminución da taxa feminina en 0,3 puntos con respecto ao
trimestre pasado.
Con respecto ao primeiro trimestre do ano 2023, o número de
homes ocupados aumenta en 10.800 persoas (un 1,9%), mentres que o de mulleres
ocupadas aumentou nun 2,6%.
Atendendo aos sectores de actividade
económica (segundo a CNAE-2009), o número de persoas ocupadas neste trimestre
diminuíu na industria e no sector servizos, pero aumentou no sector primario e
na construción. Na agricultura e pesca, o incremento da poboación ocupada
cifrouse en 400 traballadores e traballadoras máis que hai 3 meses. Na construción
a ocupación aumenta en 3.300 persoas respecto ao trimestre anterior. O sector
servizos foi o que rexistrou o maior descenso, con 11.600 persoas menos. Na
industria a ocupación diminuíu en 200 persoas.
Con respecto ao mesmo trimestre de 2023, a ocupación aumentou en
todos os sectores: no sector primario, un 7,9%; na industria, un 7,5%; na
construción, 3,6%; e no sector servizos, un 0,5%.
Poboación asalariada
En Galicia había 919.200 persoas asalariadas no primeiro
trimestre de 2024, 778.700 con contrato indefinido e os 140.500 restantes con
contrato temporal. Con respecto ao trimestre anterior rexístranse 9.900
asalariados e asalariadas máis con contrato indefinido. O número de persoas
suxeitas a un contrato temporal diminúe, pola contra, en 11.000 efectivos (o
que supón, en termos relativos, unha baixada do 7,3% con respecto ao cuarto
trimestre de 2023). No que respecta á variación interanual, a cifra de persoas
con contrato indefinido aumentou un 4,4%, e as persoas con contrato temporal
diminuíron, pola contra, un 4,7%.
A taxa de temporalidade, calculada como a porcentaxe de persoas
con contrato temporal sobre o total de asalariados e asalariadas, sitúase no
15,3%.
Poboación parada
No primeiro trimestre de 2024 en Galicia había 131.600 persoas
en paro, 16.700 máis que no trimestre anterior. A taxa de paro aumentou 1,3
puntos e sitúase no 10,5%.
Con respecto ao primeiro trimestre do ano 2023, o número de
parados e paradas diminúe en 3.400 persoas (un 2,5%) e a taxa de paro, a súa
vez, decrece 0,4 puntos en termos interanuais.
Por sexo, con respecto ao trimestre
anterior, aumenta tanto o paro masculino coma o feminino: o número total de
homes parados sitúase en 64.800 persoas (11.000 máis que hai tres meses) e o de
mulleres é de 66.800 persoas (5.700 mulleres paradas máis). Ambas as dúas taxas
de paro, tanto a masculina como a feminina, incrementáronse, situándose a
primeira no 10% e a segunda no 10,9%.
No tocante á variación interanual, o número de parados entre o
sexo masculino aumenta en 700 persoas (un 1,1% máis), mentres que o volume de
paradas diminúe en 4.100 persoas (un 5,8% menos que hai un ano).
Fogares
No primeiro trimestre de 2024, o número de fogares nos que todos
os seus membros activos están en paro aumenta en 3.300 unidades e sitúase en
49.900 fogares. Respecto ao primeiro trimestre de 2023, esta tipoloxía de
fogares diminúe un 12,1%.
Pola súa banda, o número de fogares nos que todos os seus
membros activos son ocupados diminúe en 10.500 unidades. O número de fogares
nesta situación é de 649.400. En relación co mesmo trimestre do ano anterior
hai 14.400 fogares máis nesta situación, o que supón un incremento do 2,3% en
termos relativos.
Poboación xuvenil
Dos 329.900 mozos e mozas galegas de entre 16 e 29 anos, 123.700
(o 37,5%) están ocupados/as, 35.500 (o 10,8%) parados/as e os 170.700 (o 51,7%)
restantes son inactivos.
A taxa de ocupación deste colectivo sitúase
no 37,5% no primeiro trimestre de 2024. Con respecto ao trimestre anterior
diminúe 1,8 puntos; con respecto ao mesmo trimestre do ano 2023 aumenta 0,2
puntos.
A taxa de paro xuvenil sitúase no 22,3% neste trimestre; aumenta
5,8 puntos respecto ao trimestre anterior. En comparación co primeiro trimestre
de 2023, aumenta 3 puntos.
No primeiro trimestre de 2024, o 73,2% dos
ocupados e das ocupadas de entre 16 e 29 anos traballa a xornada completa. Con
respecto ao cuarto trimestre de 2023, a cifra de ocupados a xornada completa
baixa un 0,7%. A cifra de mozos e mozas ocupadas a xornada parcial tamén
diminúe neste trimestre; en concreto, baixa en 4.400 persoas. Con respecto ao
primeiro trimestre de 2023, aumenta tanto a ocupación xuvenil que traballa a
xornada completa (en 2.800 persoas), como a ocupación a xornada parcial (en 600
persoas).
Dos 113.700 asalariados e asalariadas
existentes neste trimestre de entre 16 e 29 anos, o 68,4% está vinculado á
empresa por medio dun contrato indefinido. O número de mozos e mozas con
contrato indefinido aumenta un 1,2% respecto ao trimestre anterior; rexistra un
incremento tamén, neste caso do 17,2%, respecto ao mesmo trimestre de 2023. O
número de mozos e mozas asalariadas con contrato temporal diminúe un 13,9%
respecto ao trimestre pasado, e rexistra unha diminución do 18,4% respecto ao
primeiro trimestre de 2023.
A taxa de temporalidade para o colectivo dos mozos e mozas de
entre 16 e 29 anos sitúase no 31,7%.
Grandes concellos
Se comparamos os datos dos sete grandes concellos galegos
(aqueles que superan os 50.000 habitantes), observamos que Lugo e Ourense son
os que presentaron as maiores taxas de ocupación (54,7% e 52,4%
respectivamente) no primeiro trimestre de 2024. Ferrol é o concello coa menor
taxa de ocupación (37,5%). No referido ás taxas de paro, este trimestre
Santiago de Compostela é o concello de entre os sete grandes con menor valor
(7,4%) e Ferrol o que presenta a taxa de paro máis elevada (18,1%).
Fonte: INE-IGE. Enquisa de
poboación activa
