sábado, 7 de noviembre de 2026

Eleccións 29-N: no acto de presentación das candidaturas do PP de Ourense ao Congreso e o Senado


A 
cabeza de lista do PP ao Congreso dos Deputados pola provincia de Ourense, Ana Vázquez, destacou que a candidatura combina “experiencia parlamentaria, coñecemento das institucións, vinculación cos concellos e novas achegas profesionais e sociais”, cun compromiso compartido de poñer esa preparación ao servizo da provincia. “Representar Ourense esixe escoitar os seus concellos e sectores sociais, presentar propostas, facer seguimento dos compromisos e explicar os resultados”, e supón un compromiso “leal e esixente” que será atendido polo “futuro Goberno de Alberto Núñez Feijóo”, afirmou.

 

Así o sinalou tras a foto de familia da candidatura do PP da provincia de Ourense ao Congreso e ao Senado de cara ás eleccións xerais do vindeiro 29 de novembro. Neste sentido reivindicou unha representación “leal e esixente” que consiga respostas ás necesidades de Ourense nun Goberno presidido por Alberto Núñez Feijóo. Entre as prioridades, atópanse o impulso á A-76 Ourense-Ponferrada, á A-56 cara a Lugo, á variante exterior ferroviaria e á remodelación da estación de Ourense, así como á estación de mercadorías de San Cibrao das Viñas, ás melloras viarias entre Ourense e Os Peares e ás actuacións de depuración no río Barbaña. 

 

A candidata tamén defendeu reforzar a atención nos cuarteis da Garda Civil e os medios policiais e xudiciais para garantir a seguridade da cidadanía con independencia do seu lugar de residencia.