Publica o diario valdeorrés “O Sil” unha información titulada “Os deputados ourensáns do PP preguntan no Congreso se se rectificará a supresión das paradas do AVE na Gudiña”
Dí así:
“Os deputados do Partido Popular no Congreso pola provincia de Ourense, Celso Delgado, Ana Vázquez e Rosa Quintana, veñen de rexistrar unha nova pregunta por parlamentaria, para preguntar se RENFE e o MITMS rectificarán a “decisión de suprimir desde o 9 de xuño as paradas de trens nas estacións intermedias do corredor ferroviario de alta velocidade Galicia-Madrid e moi especialmente na estación de alta velocidade da Gudiña-Porta de Galicia e en consecuencia procederá a restablecer en xaneiro de 2026 as frecuencias eliminadas”.
No texto introdutorio da pregunta os deputados aputan quen “quedan poucos días para finalizar 2025 e segue sen producirse ningunha rectificación por parte de RENFE e do Ministerio de Transportes e Movilidad Sostible (MITMS) da inxusta decisión tomada o 9 de xuño de suprimir paradas dos trens AVE na estación Porta de Galicia da Gudiña.
Desde aquela data os miles de usuarios desa estación non teñen máis alternativa matinal para viaxar a Madrid que tomar un AVLO ás 12:08 que chega á capital ás 14:08. E se queren regresar o mesmo día o último tren sae ás 18:06 para chegar á Gudiña ás 20:02.
Un auténtico disparate de horarios, irracionais, inútiles e discriminatorios para os habitantes do medio rural, pois antes do do 9 de xuño, os usuarios da estación da terminal Porta de Galicia así como os de Sanabria podían subirse a un tren AVE e chegar a Madrid ás 10:34 horas e así podían realizar actividades na capital por exemplo tratamentos médicos, consultas, actividades administrativas, empresariais, formativas etc. ou ben por exemplo transbordar a trens con destino a outros corredores ferroviarios ou tomar un avión en Barajas”.